قازاقستاندا سيرەك كەزدەسەتىن جانۋارلاردىڭ ءبىرىڭعاي دەرەكتەر بازاسى قۇرىلدى

الماتى. KAZINFORM - الماتىدا قازاقستاننىڭ سيرەك كەزدەسەتىن جانە جويىلىپ بارا جاتقان جانۋارلار تۇرلەرىنىڭ ءبىرىڭعاي دەرەكقورىن قۇرۋ بويىنشا اۋقىمدى جۇمىس اياقتالدى.

بۇل تۋرالى وڭىرلىك كوممۋنيكاتسيالار قىزمەتىنىڭ باسپا ءسوز ءماسليحاتى بارىسىندا ق ر زوولوگيا ينستيتۋتى باس ديرەكتورىنىڭ ورىنباسارى مارينا چيريكوۆا مالىمدەدى.

- ءبىز العاش رەت سيرەك كەزدەسەتىن تۇرلەر تۋرالى 2959 جازبانى قامتيتىن ءبىرىڭعاي اقپارات جۇيەسىن جينادىق. بۇل ەسەپكە الۋدى تيىمدىرەك جۇرگىزۋگە، قورعاۋ باعدارلامالارىن ازىرلەۋگە جانە پوپۋلياتسيالارداعى وزگەرىستەردى بولجاۋعا مۇمكىندىك بەرەدى، - دەدى ول.

ونىڭ ايتۋىنشا، جۇيە گاج دەرەكتەرى نەگىزىندە جاسالعان ينتەراكتيۆتى كارتالاردى قامتيدى. بارلىعى قىزىل كىتاپتىڭ جاڭا باسىلىمىنا ەنگەن 217 كارتا ازىرلەندى.

بۇدان باسقا، قازاقستاننىڭ سيرەك كەزدەسەتىن تۇرلەرىنە ارنالعان ۆەب- پورتال ازىرلەنىپ جاتىر. سونداي-اق قورعالاتىن تابيعي اۋماقتاردا جانۋارلاردى ەسەپكە الۋدىڭ جاڭا ادىستەرى ەنگىزىلدى.

عالىمدار 19 سيرەك ومىرتقالى جانۋاردى قامتيتىن كريوبيولوگيالىق كوللەكتسيانى جاساۋعا ەرەكشە نازار اۋداردى. ولاردىڭ اراسىندا قار بارىسى، توعاي بۇعىسى، جابايى بۇعى، دالا قىرانى، اق قۇيرىق قىران جانە باسقا دا تۇرلەر بار.

سونىمەن قاتار، ق ر زوولوگيا ينستيتۋتىنىڭ باس عىلىمي قىزمەتكەرى رومان ياشەنكو 2003-جىلى قازاقستاندا كيىكتەردىڭ سانى 21 مىڭ داراقتى قۇراعانىن اتاپ ءوتتى. قازىر بۇل كورسەتكىش 4 ميلليونعا ءوستى.

- قازىر كيىكتەردىڭ الەمدىك پوپۋلياتسياسىنىڭ %99 قازاقستاندا تۇرادى، ال تابيعاتتى قورعاۋدىڭ حالىقارالىق وداعى بۇل ءتۇردىڭ مارتەبەسىن «قۇرىپ كەتۋ شەگىندەگى» تۇرىنەن «قاۋىپ-قاتەرگە جاقىن» تۇرىنە دەيىن كوتەردى. بۇل تاريحتاعى ءسۇت قورەكتىلەردىڭ سانىن قالپىنا كەلتىرۋدىڭ ەڭ ءساتتى جاعدايلارىنىڭ ءبىرى، - دەدى رومان ياشەنكو.

سونىمەن قاتار، ونىڭ ايتۋىنشا، جەك دۋاداقتى ساقتاۋ باعدارلاماسى دا تابىستى جۇزەگە اسىرىلىپ جاتىر. 2009-جىلى تۇركىستان وبلىسىندا وسى قۇستاردى ءوسىرۋ ورتالىعى قۇرىلدى.

- سونداي-اق، ⅩⅩ عاسىردا قازاقستاندا كەڭ تارالعان، ءبىراق كەيىن وتە سيرەك كەزدەسەتىن سۇڭقار سانىن زەرتتەۋ جانە قالپىنا كەلتىرۋ جۇمىستارى جۇرگىزىلۋدە. الماتىدا بالوبانداردى جاساندى وسىرۋمەن اينالىساتىن «سۇڭقار» ج ش س پيتومنيگى جۇمىس ىستەيدى. بۇگىنگى تاڭدا وندا 700 گە جۋىق داراقتى جابايى تابيعاتقا شىعاردى، - دەپ قورىتىندىلادى عالىم.

ەسكە سالايىق، وسىعان جاڭارتىلعان «قىزىل كىتاپ» قانداي جانۋارلارمەن تولىققانى تۋرالى جازعان ەدىك.