قازاقستاندا سيفرلاندىرۋ باعىتىندا قانداي جۇمىستار اتقارىلىپ جاتىر - ۇكىمەتتە وتىرىس ءوتتى
استانا. KAZINFORM – ق ر پرەمەر-ءمينيسترىنىڭ ءبىرىنشى ورىنباسارى رومان سكلياردىڭ توراعالىعىمەن وتكەن ينۆەستيتسيالىق احۋالدى جاقسارتۋ جونىندەگى كەڭەستىڭ كەزەكتى وتىرىسىندا سيفرلاندىرۋ بويىنشا وزەكتى ماسەلەلەر مەن قازاقستاننىڭ سيفرلىق كودەكسىن ازىرلەۋ بارىسى تالقىلاندى.

ق ر ۇكىمەتى باسپا ءسوز قىزمەتىنىڭ حابارلاۋىنشا، رومان سكليار سوڭعى جىلدارى قازاقستاندا سيفرلاندىرۋ بويىنشا اۋقىمدى رەفورمالار جۇرگىزىلگەنىن اتاپ ءوتتى. ۇكىمەت تاراپىنان سيفرلىق تەحنولوگيالار مەن جاساندى ينتەللەكتىنى دامىتۋ ءۇشىن قولايلى جاعدايلار جاسالۋدا.
بۇگىندە %92 مەملەكەتتىك قىزمەت ەلەكتروندى تۇردە كورسەتىلەدى، ونىڭ %86 سمارتفون ارقىلى قولجەتىمدى.
جاساندى ينتەللەكتىنى ەل تىرشىلىگىندە جاپپاي قولدانۋ بويىنشا بەلسەندى جۇمىستار جۇرگىزىلىپ جاتىر. ونىڭ نەگىزىندە حالىقتىڭ جانە جولداعى قوزعالىستىڭ قاۋىپسىزدىگىن قامتاماسىز ەتەتىن «سەرگەك» جۇيەسى جانە اۆتوماتتاندىرىلعان ينسۋلت دياگنوستيكاسىنا ارنالعان «CEREBRA» پلاتفورماسى جانە مەدمەكەمەلەر جۇيەلەرىنە ارنالعان «Forus Data» جۇمىس ىستەيدى.
NVIDIA، Coursera, Amazon, Microsoft جانە Google كومپانيالارىمەن بىرلەسە جاساندى ينتەللەكت جانە ماشينالىق وقىتۋ بويىنشا تەگىن سەرتيفيكات بەرىلەتىن وقىتۋ باعدارلامالارى جۇزەگە اسىرىلىپ جاتىر.
سونداي-اق قازاقستان تسيفرلىق الەمدەگى جاڭا جىبەك جولىنىڭ باستى قاتىسۋشىسى بولۋعا ۇمتىلادى.
بۇل باعىتتاعى باستى قۇجات - ەلدى سيفرلاندىرۋدىڭ نەگىزگى پرينتسيپتەرى بەلگىلەنگەن سيفرلىق كودەكس بولماق. ول سيفرلىق تەحنولوگيالاردى، ونىڭ ىشىندە جاساندى ينتەللەكتتى رەتتەۋدىڭ جاڭا تاسىلدەرىن ەنگىزۋگە، ازاماتتار مەن بيزنەس ءۇشىن قاۋىپسىز جانە جايلى سيفرلىق ورتا قۇرۋعا مۇمكىندىك بەرەدى.
وتىرىس بارىسىندا قازاقستانداعى امەريكا ساۋدا پالاتاسىنىڭ اتقارۋشى ديرەكتورى دوريس برەدبەري، ۇلى بريتانيانىڭ قازاقستانداعى توتەنشە جانە وكىلەتتى ەلشىسى كەتي ليچ، يتاليانىڭ قازاقستانداعى توتەنشە جانە وكىلەتتى ەلشىسى ماركو البەرتي، ە ق د ب ورتالىق ازيا بويىنشا باسقارۋشى ديرەكتورى حۋسەين وزحان، دۇنيەجۇزىلىك بانكتىڭ قازاقستانداعى تۇراقتى وكىلى اندرەي ميحنيەۆ، سونداي-اق Dentons, Microsoft جانە Google كومپانيالارىنىڭ وكىلدەرى بايانداما جاسادى.
سيفرلىق كودەكستى ازىرلەۋ بويىنشا جۇرگىزىلىپ جاتقان جۇمىستارعا قاتىستى سيفرلىق دامۋ، يننوۆاتسيالار جانە اەروعارىش ونەركاسىبى ءبىرىنشى ۆيتسە-ءمينيسترى قانىش تولەۋشين تۇسىنىكتەمە جاسادى.
كەڭەس وتىرىسىن قورىتىندىلاي كەلە، رومان سكليار قازاقستان ۇكىمەتى ءوزارا ءتيىمدى سەرىكتەستىك قۇرۋعا باعىتتالعان تالقىلاۋلارعا، ۇسىنىستار مەن جاڭا جوبالارعا دايىن جانە اشىق ەكەنىن اتاپ ءوتتى.
سونىمەن قاتار پرەمەر-ءمينيستردىڭ ءبىرىنشى ورىنباسارى ەلىمىزدە سيفرلىق تەحنولوگيالاردى ءارى قاراي دامىتۋ بويىنشا ايتىلعان بارلىق كەڭەس پەن ۇسىنىستى پىسىقتاۋدى تاپسىردى.