قازاقستاندا سوتتالعان ادامدار قانداي جۇمىس ىستەپ ءجۇر

استانا. KAZINFORM - وتكەن جىلى ەلىمىز بويىنشا سوتتالعان جانداردىڭ ىشىندە ەڭبەككە قابىلەتتى 23431 ادامنىڭ اراسىنان 11031 ءى جۇمىسقا ورنالاستى. ال بيىل 21829 ادامنىڭ 13252 ءسى ەڭبەكپەن قامتىلدى.

بۇل تۋرالى Kazinform اگەنتتىگىنىڭ ساۋالىنا ءىىم قىلمىستىق-اتقارۋ جۇيەسى كوميتەتىنىڭ جاۋابىندا ايتىلعان.

- مەكەمە اكىمشىلىگى سوتتالعان ادامداردى مەكەمەنىڭ شارۋاشىلىق قىزمەت كورسەتۋ قىزمەتىنە، قىلمىستىق-اتقارۋ جۇيەسىنىڭ وندىرىستىك كاسىپورىندارىنا، باسقا دا مەملەكەتتىك ۇيىمدارعا، سونداي- اق كاسىپكەرلىك سۋبەكتىلەرىنە تيەسىلى ۇيىمدارعا مىندەتتى تۇردە جۇمىسقا ورنالاستىرادى. ەڭ الدىمەن سوت ۇكىمى بويىنشا اتقارۋشى پاراعى بار سوتتالعاندار ەڭبەككە تارتىلادى. بۇگىندە مەكەمە اكىمشىلىگى ۇسىنعان جۇمىستان باس تارتۋ فاكتىلەرى تىركەلگەن جوق، - دەگەن جاۋاپ الدىق ۆەدومستۆودان.

جۇمىسشىلاردىڭ ەڭبەكاقىسى قازاقستان رەسپۋبليكاسىنىڭ زاڭناماسىنا سايكەس، ەڭبەك شارتى نەگىزىندە تولەنەدى. اي سايىنعى جالاقىدان زاڭنامادا بەلگىلەنگەن مولشەردە، ياعني كەمىندە 50 پايىزى ۇستالادى.

- كەلتىرىلگەن زالالدى وتەۋ سوماسى سوتتالعان ادامنىڭ تابىسىنا تىكەلەي بايلانىستى. سونىمەن بىرگە، تالاپتى وتەۋ مولشەرى شارتتى تۇردە مەرزىمىنەن بۇرىن بوساتۋ نەمەسە جازانىڭ وتەلمەگەن بولىگىن نەعۇرلىم جەڭىل جازا تۇرىنە اۋىستىرۋ تۋرالى وتىنىشتەردى قاراۋ كەزىندە ماڭىزدى ءرول اتقارادى، ءبىراق قاماۋ جاعدايىنا اسەر ەتپەيدى، - دەپ تۇسىندىرىلگەن.

سوتتالعان جانداردىڭ ەڭبەكاقىسى ەڭبەك كودەكسىنە سايكەس ەكى نىساندا تولەنەدى - مەرزىمدى جانە كەلىسىمدى. مەرزىمدى اقى تولەۋ كەزىندە جالاقى ناقتى جۇمىس ىستەگەن ۋاقىتىنا بەلگىلەنگەن تاريفتىك مولشەرلەمە نەمەسە جالاقى نەگىزىندە ەسەپتەلەدى. كەلىسىمدى تولەم كەزىندە - ورىندالعان ءار جۇمىس ورىندالۋى نەمەسە دايىندالعان ونىمگە قاراي تولەنەدى.

- جالاقى مولشەرى ءار ازاماتقا جەكە قاراستىرىلادى، ەڭ تومەنگى مولشەرى - 6 مىڭ تەڭگە، ەڭ جوعارعىسى - 250 مىڭ تەڭگە. شارۋاشىلىق قىزمەت كورسەتۋ سالاسىندا جالاقى مولشەرى بەكىتىلگەن، ياعني ەڭ تومەنگى جالاقى كولەمىندە - 85 مىڭ تەڭگە، - دەيدى مينيسترلىكتەن.

سونىمەن قاتار، قولدانىستاعى زاڭناما اياسىندا شاعىن جانە ورتا بيزنەس سۋبەكتىلەرىمەن ىنتىماقتاستىق ورناتىلعان. قىلمىستىق- اتقارۋ جۇيەسى مەكەمەلەرىندە كەڭ اۋقىمدى ونىمدەر شىعارىلادى، ونىڭ ىشىندە فورمالار، مۇلىك، زاتتار، ازىق-تۇلىك، اعاش جانە مەتال بۇيىمدارى، قۇرىلىس ماتەريالدارى تاعى سول سياقتى.

مەكەمەلەردە جازاسىن وتەۋشى جانداردى تەحنيكالىق جانە كاسىپتىك بىلىممەن قامتۋ قاتار جۇرەدى. ماماندىقتار ءتىزىمى مەكەمە اكىمشىلىگىمەن، جەرگىلىكتى اتقارۋشى ورگاندارمەن كەلىسىم نەگىزىندە، ەڭبەك نارىعىنىڭ مونيتورينگىنە سۇيەنە وتىرىپ قۇراستىرىلادى. وقۋ پروتسەسىن ۇيىمداستىرۋ ۋاكىلەتتى ورگاننىڭ ءبىلىم سالاسىنداعى ۋاكىلەتتى ورگانمەن كەلىسىلگەن قاعيدالارىنا سايكەس جۇزەگە اسىرىلادى.

- 2023-2024 وقۋ جىلىندا 2884 سوتتالعان جان ءبىلىم الىپ، ماماندىقتاردى مەڭگەردى. ونىڭ ىشىندە توكار، تىگىنشى، اۆتوسلەسار، گاز-ەلەكتر دانەكەرلەۋشى، اسپاز، دانەكەرلەۋ ءىسى تاعى باسقا. وتكەن وقۋ جىلىندا 200 دەن استام ازامات قىسقا مەرزىمدى كۋرستان ءوتىپ، سەرتيفيكات الدى. ولار تىرناق ءستيليسى، شاشتاراز، اسپاز، تىگىنشى كاسىبىن مەڭگەردى. جازاسىن وتەپ جاتقانداردىڭ IT- ماماندىعىن مەڭگەرۋى تەحنيكالىق سەبەپتەرگە بايلانىستى قازىر مۇمكىن ەمەس، - دەپ حابارلايدى ءى ءى م.

بۇعان دەيىن ىشكى ىستەر مينيسترلىگى تۇرمەدە ءداستۇرلى دىنگە قايتقانداردى وزگە سوتتالعانداردىڭ ءدىني ساۋاتىن اشۋعا تارتقانى تۋرالى جازعان ەدىك.