قازاقستاندا ەسكىرگەن 6 مىڭ توننادان استام پەستيسيد بار
الماتى. KAZINFORM - بۇل تۋرالى الماتىدا ءوتىپ جاتقان ورتالىق ازيا ەلدەرىندە جاسىل اۋىل شارۋاشىلىعىن دامىتۋ ءۇشىن لاستانعان اۋىلشارۋاشىلىق توپىراعىنىڭ بيو جانە فيتورەمەدياتسيالىق تەحنولوگيالارى بويىنشا حالىقارالىق كونفەرەنتسيا بارىسىندا ق ر ەكولوگيا جانە تابيعي رەسۋرستار مينيسترلىگىنىڭ وكىلى ءمالىم ەتتى.
ورتالىق ازيا ەلدەرىندەگى اۋىل شارۋاشىلىعى جەرلەرىنىڭ لاستانۋ پروبلەمالارىن شەشۋگە ارنالعان حالىقارالىق كونفەرەنسياعا ءارتۇرلى ەلدەردىڭ ساراپشىلارى، ب ۇ ۇ ازىق-تۇلىك جانە اۋىل شارۋاشىلىعى ۇيىمىنىڭ (ف ا و) حالىقارالىق كەڭەسشىلەرى، عىلىمي-زەرتتەۋ ينستيتۋتتارىنىڭ عالىمدارى، ءتيىستى مەملەكەتتىك ورگانداردىڭ جانە ازاماتتىق قوعامداستىقتىڭ وكىلدەرى قاتىسىپ جاتىر.
ماماندار ايماقتاعى اۋىلشارۋاشىلىق توپىراقتارىن قالپىنا كەلتىرۋ شەشىمدەرىن ىلگەرىلەتەتىن ورتالىق ازيا ەلدەرىنىڭ جۇمىس توبىن قۇرۋ، بيو-فيتورەمەدياتسيا جانە ەكولوگيالىنى ودان ءارى دامىتۋ بويىنشا ءبىرقاتار ماسەلەنى كوتەردى.
شارا بارىسىندا ق ر ەكولوگيا جانە تابيعي رەسۋرستار مينيسترلىگىنىڭ قالدىقتاردى باسقارۋ دەپارتامەنتىنىڭ وندىرىستىك قالدىقتار باسقارماسىنىڭ باستىعى اسەل قاسەنوۆا ەسكىرگەن پەستيسيدتەر تۋرالى ايتتى.
«ءبىز ەلدە ەسكىرگەن پەستيسيدتەرگە ۇلتتىق تۇگەندەۋ جۇرگىزىلدى. سونىڭ ناتيجيەسىندە قازاقستاندا ەسكىرگەن 6 مىڭ توننادان استام پەستيسيد بار ەكەنى انىقتالدى. بۇل پەستيسيدتەردىڭ قاي وڭىرگە تيەسىلى تۋرالى قاجەتتى اناليتيكالىق ەسەپ دايىندالىپ جاتىر. سونداي-اق ونىڭ ساپاسى زەرتحانالاردا تەكسەرىلەتىن بولادى»، - دەدى اسەل قاسەنوۆا.
ايتۋىنشا، انىقتالعان ەسكىرگەن پەستيسيدتەر جويىلادى. سونىمەن قاتار، توپىراقتاعى زياندى قالدىقتاردى شىعارۋدا نازاردان تىس قالمايدى. بۇل جۇمىستارعا قاراجات مينيسترلىك نەمەسە جەرگىلىكتى اكىمدىك بيۋدجەتىنەن بولىنەدى.
اۆتور
الما مۇقانوۆا
