قازاقستاندا سۋ استىندا قالعان ۇيلەر سانى 3412 گە جەتتى
استانا. KAZINFORM - ورتالىق كوممۋنيكاتسيالار قىزمەتىندە وتكەن بريفينگىدە توتەنشە جاعدايلار مينيسترلىگى ازاماتتىق قورعانىس جانە اسكەري بولىمدەر كوميتەتىنىڭ اعا وفيتسەرى ەراسىل سايپاش سۋ العان ۇيلەردىڭ سانىن اتادى.
سۋ تاسقىنى باستالعاننان بەرى ازاماتتىق قورعانىس قىزمەتتەرى 76 مىڭعا جۋىق ادامدى، ونىڭ ىشىندە 30 مىڭعا جۋىق بالانى جانە 45 مۇمكىندىگى شەكتەۋلى ازاماتتى قاۋىپسىز ورىنعا جەتكىزدى.
«ۋاقىتشا پانالاۋ بەكەتتەرىندە 7703 ادام، ونىڭ ىشىندە 3266 بالا ورنالاستىرىلدى. توتەنشە جاعدايلار، قورعانىس مينيسترلىگى مەن ۇلتتىق ۇلاننىڭ اۋە كەمەلەرى قۇتقارۋ جۇمىسىن ءالى جۇرگىزىپ جاتىر. 7 ميلليون 828 مىڭنان استام تەكشە مەتر ەرىگەن قار سۋى سورىپ شىعارىلدى. 1090 نان استام قۇمقاپ پەن 996,1 مىڭنان استام توننا ينەرتتى ماتەريال توسەلدى»، - دەدى كوميتەت وكىلى.
ەراسىل سايپاشتىڭ مالىمەتى بويىنشا، تاسقىننان قۇتقارۋ جۇمىستارىنا 16 مىڭعا جۋىق ادام، 3 مىڭعا جۋىق تەحنيكا، 6 اۋە كەمەسى جۇمىلدىرىلعان.
«وسى ساعاتتا اتىراۋ، اقتوبە، اقمولا، قوستاناي، باتىس قازاقستان، سولتۇستىك قازاقستان جانە پاۆلودار وبلىستارىندا 3412 جەكە تۇرعىن ءۇي، 421 اۋلا جانە 1926 ساياجاي ءۇيى سۋ استىندا قالىپ وتىر»، - دەدى ت ج م وفيتسەرى.
