قازاقستاندا پرەزيدەنتتىڭ كادرلىق رەزەرۆىنە ىرىكتەۋ ەرەجەسى وزگەرتىلدى
استانا. KAZINFORM - مەملەكەت باسشىسى قاسىم-جومارت توقايەۆ ق ر قارۋلى كۇشتەردىڭ، ۇلتتىق ۇلاننىڭ، قۇقىق قورعاۋ جانە ارناۋلى مەملەكەتتىك ورگانداردىڭ، سونداي-اق ازاماتتىق قورعاۋ ورگاندارىنىڭ جوعارعى قولباسشىلىعى مەن باسشىلىعىنىڭ پرەزيدەنتتىك رەزەرۆىنە كانديداتتاردى ىرىكتەۋ قاعيدالارىنا وزگەرىستەر ەنگىزۋ تۋرالى جارلىققا قول قويدى.
ەنگىزىلگەن تۇزەتۋلەرگە سايكەس، ەندى پرەزيدەنتتىك رەزەرۆكە ۇمىتكەرلەردى ىرىكتەۋ اسكەري قىزمەتشىلەردىڭ جەكە جانە ىسكەرلىك قاسيەتتەرىن باعالاۋ، ولاردىڭ قىزمەتتىك قىزمەتىنىڭ ناتيجەلەرى جانە اتتەستاتتاۋ شەشىمى نەگىزىندە عانا جۇزەگە اسىرىلمايدى. مەملەكەتتىك قىزمەت ىستەرى جونىندەگى ۋاكىلەتتى ورگان بەلگىلەگەن ولشەمدەر بويىنشا كادرلىق اقپاراتتىق جۇيە ارقىلى جينالعان ۇپايلار دا ەسەپكە الىنباق.
ال ارناۋلى مەملەكەتتىك ورگاندارىندا پرەزيدەنتتىك رەزەرۆكە كانديداتتار جەكە جانە ىسكەرلىك قاسيەتتەرىنە، جۇمىس ناتيجەلەرىنە جانە اتتەستاتتاۋ كوميسسياسىنىڭ شەشىمىنە قاراي ىرىكتەلەدى.
جارلىق 2024 -جىلدىڭ 31-شىلدەسىندە كۇشىنە ەندى.
اۆتور
ورالحان قوجانوۆ
