قازاقستاندا قىزمەتىنە تىيىم سالىنعان شەتەلدىك جۋرناليستەردىڭ ءتىزىمى بار ما - ۆيتسە- مينيستر جاۋابى
استانا. KAZINFORM - سەنات دەپۋتاتى نۇريا نيازوۆا مادەنيەت جانە اقپارات ۆيتسە-ءمينيسترى قانات ىسقاقوۆتان شەتەلدىك جۋرناليستەردى اككرەديتتەۋ ءتارتىبى تۋرالى سۇرادى.

«مەنىڭ سۇراعىم وزگە ەلدەردەگى قىزمەتى قانداي دا ءبىر ەلدىڭ مەملەكەتتىك قۇرىلىمىن بۇزۋعا باعىتتالدى دەپ باعالانعان جۋرناليستەرمەن بايلانىستى. بىزدە سونداي جۋرناليستەردىڭ ءتىزىمى بار ما؟ ونداي تۇلعالاردىڭ ەلىمىزگە كىرۋىنە جانە اقپاراتتىق قىزمەتىنە تىيىم سالۋ قالاي بەلگىلەنگەن؟» - دەپ سۇرادى سەناتور.
قانات ىسقاقوۆتىڭ سوزىنشە، بۇل ماسەلە قوعامدا كوپ پىكىرتالاس تۋعىزعان.
«بىزدە اقپارات مينيسترلىگى رەتىندە ونداي دەرەكتەر جوق. ءبىراق بۇل ماسەلەگە جۇيەلى تۇردە كەلگەنىمىزدى ايتامىن. زاڭ جوباسىندا شەتەلدىك ب ا ق پەن جۋرناليستەردى اككرەديتتەۋمەن سىرتقى ىستەر مينيسترلىگى اينالىساتىنى تۋرالى نورمالار بار. سونىمەن بىرگە سىرتقى ىستەر مينيسترلىگىنىڭ قازاقستان زاڭناماسى اياسىندا اككرەديتتەۋدەن باس تارتۋعا نەمەسە اككرەديتاتسيا مەرزىمىن سوزۋدان باس تارتۋعا، اككرەديتاتسيانى قايتارىپ الۋعا قۇقىعى بار. بۇل سىرتقى ىستەر مينيسترلىگىنە قانداي دا ءبىر جۋرناليستىڭ ارەكەتى قازاقستاننىڭ ەگەمەندىگىنە، اۋماقتىق تۇتاستىعىنا زيان كەلتىرەتىن بولسا، بۇكىل قاجەتتى ارەكەتتەر قابىلداۋعا مۇمكىندىك بەرەدى. بۇل نورما «ماسس- مەديا تۋرالى» زاڭنىڭ جوباسىندا بار»، - دەدى قانات ىسقاقوۆ.
سىرتقى ىستەر ءمينيسترىنىڭ ءبىرىنشى ورىنباسارى اقان راحمەتۋللين جاڭا زاڭدا بۇل ماسەلەمەن بايلانىستى نورمالار قالاي وزگەرگەنىن ءتۇسىندىردى.
«بۇرىن اككرەديتتەۋ جاي عانا ەرەجەدە بولعان. ول ەرەجە بويىنشا ءبىز شەتەلدىك جۋرناليستەرگە اككرەديتاتسيا بەرمەسەك تە، جۇمىس ىستەۋگە قۇقىعى بار بولاتىن. ويتكەنى سونداي زاڭعا ىلەسپە اكت بولعان. ال قازىر «ماسس- مەديا تۋرالى» زاڭنىڭ 30-بابىندا شەتەلدىك جۋرناليستەردىڭ قىزمەتىن رەتتەۋگە تولىق قۇقىق بولادى»، - دەدى ول.