قازاقستاندا قىتايمەن سۋ ءبولۋ كەلىسسوزدەرىن جۇرگىزە الاتىن نەشە ديپلومات بار

استانا. KAZINFORM - سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ قازاقستاندا قىتايمەن سۋ ءبولۋ كەلىسسوزدەرىن جۇرگىزە الاتىن نەشە ديپلومات بار ەكەنىن ايتتى.

ۆەدومستۆونىڭ القا ماجىلىسىنەن جۋرناليستەر الدىنا شىققان مينيسترگە ترانسشەكارالىق وزەندەر بويىنشا كەلىسسوز جۇرگىزەتىن ديپلوماتتاردىڭ تاپشىلىعى تۋرالى سۇراق قويىلدى.

- ءبىزدىڭ مينيسترلىكتىڭ قۇرامىندا ترانسشەكارالىق وزەندەر بويىنشا كەلىسسوز جۇرگىزەتىن ارنايى حالىقارالىق دەپارتامەنت بار. ونىڭ شتات سانى 18 ادام. ونىڭ ىشىندە ەكى باسقارما بار. ءبىر باسقارما تىكەلەي قىتاي حالىق رەسپۋبليكاسىمەن جانە رەسەي فەدەراتسياسىمەن كەلىسسوز جۇرگىزەدى. ەكىنشى باسقارما ورتالىق ازياداعى ءتورت كورشىمىزبەن كەلىسسوز جۇرگىزەدى، - دەدى ۆەدومستۆو باسشىسى.

نۇرجان نۇرجىگىتوۆتىڭ سوزىنشە، سۋ ديپلوماتياسىن دامىتۋ ءۇشىن مينيسترلىكتىڭ ورتالىق اپپاراتىنا دا ءتىل بىلەتىن ماماندار تارتىلعان.

- دەپارتامەنتتەگى 18 ادامنىڭ بىرەۋى ونىڭ باسشىسى، تاعى ءبىر ادام باسشىنىڭ ورىنباسارى. سوندا ەكى باسقارمادا 8-8 دەن سۋ ديپلوماتى بار. ودان بولەك مينيسترلىكتىڭ ورتالىق اپپاراتىندا قىتاي، اعىلشىن، تۇرىك تىلدەرىن بىلەتىن ماماندار بار. ولار دا سۋ ديپلوماتياسىن دامىتۋ ءۇشىن ارنايى شاقىرتىلعان ماماندار، - دەدى مينيستر.

ايتا كەتۋ كەرەك، قازاقستاننىڭ 400 گە جۋىق ديپلوماتى الەمدە سيرەك سانالاتىن تىلدەردى مەڭگەرگەن.