قازاقستاندا قىتاي اۆتوكولىكتەرىن وندىرەتىن زاۋىت اشىلادى
2025 -جىلى قىتايلىق Chery ،Haval ،Changan اۆتوموبيلدەرىن الماتىدا قۇراستىرۋعا ارنالعان جاڭا ءوندىرىستىڭ تۇساۋى كەسىلەدى. ال 2026 -جىلى Hyundai زاۋىتىن جاڭعىرتۋ اياقتالادى. Stan.kz ءتىلشىسى قازاقستانداعى اۆتوموبيل وندىرىسىندەگى وزگەرىستەر تۋرالى ءبىلۋ ءۇشىن الماتىداعى يندۋستريالدى ايماققا بارىپ قايتقان.
قازىر قۇرىلىسى قارقىندى تۇردە ءجۇرىپ جاتقان Astana Motors Manufacturing Kazakhstan جاڭا زاۋىتى ەكى جىلدان كەيىن ىسكە قوسىلىپ، قىتايلىق Chery, Haval جانە Changan اۆتوكولىكتەرىن %100 دانەكەرلەۋ جانە بوياۋمەن اينالىسىپ، جىلىنا 90 مىڭ اۆتوكولىك شىعاراتىن بولادى. ءوندىرىس ىسكە قوسىلعاندا 2600 ادامدى جۇمىسپەن قامتۋ جوسپارلانىپ وتىر.
300 مىڭ شارشى مەتر اۋماقتاعى قۇرىلىس 2022 -جىلدىڭ قاراشا ايىندا باستالدى. وندىرىستىك سەحتاردىڭ اۋدانى 150 مىڭ شارشى مەتردەن اسادى. ۇلكەن سەحتى كىشكەنە اۋماققا سيعىزۋ ءۇشىن سەح ەكى قاباتتى بولىپ سالىنادى. بۇل سەحتا ءۇش بىردەي برەند شىعارىلاتىندىقتان، ونىڭ اۋماعىدا ۇلكەن. جوبا قۇنى 115 ميلليارد تەڭگە.
Astana Group ءتوراعاسى نۇرلان سماعۇلوۆتىڭ ايتۋىنشا، قىتايلىق اۆتوكولىك وندىرۋشىلەرىن ءبىر ۇستەل باسىنا جيناپ، ولاردى زاۋىت اۋماعىنان شىعارۋ ءۇشىن كوپ جۇمىس ىستەلگەن. بىرنەشە برەندتىڭ ءبىر اۋماقتان شىعۋى وسى كەزگە دەيىن ەشبىر ەلدە بولماعان جاڭالىق ەكەنىن ايتادى.
«زاۋىتتا ءۇش برەندتىڭ وزىندىك جارتىلاي اۆتوماتتاندىرىلعان دانەكەرلەۋ سەحى بولادى. ياعني ءۇش سەح، بۇل بىزگە كوبىرەك جۇمىس ورىندارىن قۇرۋعا مۇمكىندىك بەرەدى. ءبىراق بوياۋ سەحى بارلىق برەندتەر ءۇشىن ءبىر، سوندىقتان جوعارى ونىمدىلىك ءۇشىن بوياۋ جەلىسى %100 اۆتوماتتاندىرىلادى. زاۋىتتىڭ قۋاتىنا كەلسەك، ءار 2,5 مينۋت سايىن كوۆەيەردەن جاڭا كولىك شىعاتىن بولادى. بارلىق جابدىقتار Chery, Haval, Changan برەندتەرىمەن بىرلەسىپ جوبالانىپ، ولاردىڭ تەحنيكالىق ستاندارتتارىنا سايكەس كەلەدى»، - دەدى نۇرلان سماعۇلوۆ.
الماتىنىڭ يندۋستريالدى اۋماعىندا ورنالاسقان مۋلتيبرەندت زاۋىتتىڭ قۇرىلىسىن 2024 -جىلدىڭ IV توقسانىندا اياقتاۋ جوسپارلانۋدا. 2025 -جىلدىڭ I توقسانىندا اۆتوموبيلدەردىڭ پيلوتتىق ءوندىرىسى باستالادى.
ال 2020 جىلدىڭ قازان ايىندا اشىلعان Hyundai Trans Kazakhstan زاۋىتى 1200 ادامدى جۇمىسپەن قامتىپ وتىر. 2021 -جىلى زاۋىت 26 مىڭ اۆتوموبيل شىعارسا 2022 -جىلى - 37205 جەڭىل اۆتوكولىك، ونىڭ %82 وتاندىق نارىقتا ساتىلسا، قالعان كولەمىن ت م د ەلدەرىنە ەكسپورتقا كەتتى. 2023 -جىلدىڭ العاشقى التى ايىندا زاۋىت ءوزى ءۇشىن رەكوردتىق 24509 اۆتوموبيل شىعاردى جانە جىلىنا 50 مىڭ اۆتوموبيل شىعارۋ دەڭگەيىنە جەتكەن.
نۇرلان سماعۇلوۆتىڭ ايتۋىنشا، اتالمىش زاۋىتتا 2026 -جىلى جەڭىل اۆتوموبيلدەردى دانەكەرلەۋ جانە بوياۋ جۇمىستارىن %100 جاساي الاتىن بولادى. Hyundai Trans Kazakhstan زاۋىتى مەن Astana Motors Manufacturing Kazakhstan جاڭا مۋلتيبرەند زاۋىتىنىڭ جيىنتىق وندىرىستىك قۋاتى كومپانياعا جاڭا بولشەكتەردى شتامپتاۋدى دامىتۋعا جول اشادى.
«Hyundai Trans Kazakhstan زاۋىتى ءۇش جىل ىشىندە قارقىندى جۇمىس ىستەپ، قازىر جىلىنا 50 مىڭ اۆتوموبيل شىعارۋ قۋاتىنا جەتتى. قازىر ءبىز ەكى ءتۇرلى مودەل شىعارامىز - Hyundai-نىڭ Accent جانە Tucson مودەلدەرى. ءبىراق بۇل ۇلكەن جۇمىستىڭ باسى عانا دەپ نىق ايتا الامىن. ءبىز جىل سايىن دانەكەرلەۋ جانە بوياۋ جاڭارتۋ ارقىلى ءوندىرىس قۋاتىن ارتتىرامىز. 2024 -جىلى دانەكەرلەۋ جانە بوياۋ ادىستەرى %25، 2025 -جىلى - %50، 2026 -جىلى كاسىپورىن %100 جاڭارىپ، ءوندىرىس كولەمى ارتا تۇسەدى»، دەيدى نۇرلان سماعۇلوۆ.
قازىرگى تاڭدا اۆتوكولىك ءوندىرۋ قۋاتىن ارتتىرۋ جانە مودەلدەردىڭ كەيبىر بولشەكتەرىن ەلىمىزدە شىعارۋ ءۇشىن وندىرىستىك الاڭداردى كەڭەيتۋ جانە سەحتاردى جاڭعىرتۋ جۇمىستارى جۇرگىزىلۋدە. ءوندىرىستى جاڭعىرتۋ ەكى كەزەڭدە جۇرگىزىلەتىن بولادى: 2023 -جىلدان باستاپ 2024 -جىلدىڭ ورتاسىنا دەيىن - دانەكەرلەۋ جانە بوياۋ سەحتارىن جاڭعىرتۋ جانە اۆتوماتتاندىرۋ، جاڭا ۇلگىدەگى شاعىن ءتۇيىندى ءوندىرىستى يگەرۋ. 2025 -جىلدان باستاپ 2026 -جىلدىڭ ورتاسىنا دەيىن Hyundai Trans Kazakhstan زاۋىتىن كەڭەيتۋ، جاڭا بوياۋ جەلىسىن سالۋ جانە جاڭا دانەكەرلەۋ سەحىن ىسكە قوسۋ.
بۇل ەكى زاۋىتتان بولەك، الماتى قالاسىنىڭ يندۋستريالدى اۋماعىندا اۆتوموبيلدىڭ كەيبىر بولشەكتەرىن شىعارۋ زاۋىتتارى ىسكە قوسىلادى. ولاردىڭ باستاماسى رەتىندە اۆتوموبيل ورىندىقتارىن ءوندىرۋشى Youngsan Glonet Corp. Ltd. (كورەيا)، اۆتوموبيل مۋلتيمەديا جۇيەسىن ءوندىرۋشى Motrex Co Ltd. (كورەيا) كومپانيالارىنىڭ زاۋىتتارىن اشىلاتىن بولادى. بۇل ءوز كەزەگىندە شەتەلدەن كەلەتىن اۆتوموبيل بولشەكتەرىن ازايتىپ، جاڭا جۇمىس ورىندارىن كوبەيتۋگە جانە اۆتوموبيل وندىرىسىنە كەتەتىن قارجىنى ازايتۋعا الىپ كەلەدى. ءوندىرىستى 2024 -جىلدىڭ باسىندا ىسكە قوسۋ جوسپارلانىپ وتىر. وندا شامامەن 90 ادام جۇمىس ىستەيدى. ەلدە بۇل سالانى بىلەتىن ماماندار بولماعاندىقتان، وڭتۇستىك كورەيادان ماماندار شاقىرىلىپ، جۇمىسقا تۇرۋعا قىزىعۋشىلىعى بار ادامدار ارنايى كۋرستان وتەدى.
قورىتا كەلگەندە Astana Motors Manufacturing Kazakhstan زاۋىتى مەن Hyundai Trans Kazakhstan زاۋىتىندا شىعارىلاتىن اۆتوموبيل سانى 140 مىڭعا جەتەدى. بۇل اۆتوكولىكتىڭ ءبىر بولىگى قازاقستاندا ساتىلسا، ەندى ءبىر بولىگى الىس-جاقىن شەتەل نارىعىنا جىبەرىلەتىن بولادى.
