قازاقستاندا «قۇلاگەر» ادەبي بايقاۋى جاريالاندى

الماتى. KAZINFORM - V دۇنيەجۇزىلىك كوشپەندىلەر ويىندارى قارساڭىندا ۇلتتىق سپورت قاۋىمداستىعى جانە قازاقستان جازۋشىلار وداعى بىرلەسە وتىرىپ قالامگەرلەر اراسىندا «قۇلاگەر» رەسپۋبليكالىق ادەبي بايقاۋىن جاريالادى.

رەسپۋبليكالىق سايىس پوەزيا، پروزا، بالالارعا ارنالعان شىعارما، كوميكس، دراما، دەرەكتى پروزا، فانتاستيكالىق نەمەسە ميفولوگيالىق شىعارما اتالىمدارى بويىنشا وتەدى. قاتىسۋشىلار ۇلتتىق سپورت تۇرلەرىن باستى تاقىرىپ ەتۋى كەرەك. وعان كەز كەلگەن قالامگەر قاتىسا الادى. الايدا بۇرىن-سوڭدى جاريالانباعان ەڭبەكتەرىن عانا ۇسىنۋى ءتيىس. ءوتىنىم 22- ماۋسىمعا دەيىن قابىلدانادى. ءار نوميناتسيانىڭ باس جۇلدەسى - 2 ميلليون تەڭگە.

بايقاۋدىڭ نەگىزگى ماقساتى - ۇلتتىق سپورتتى ناسيحاتتاۋ جانە قالامگەرلەرگە قولداۋ كورسەتۋ، ولاردى ۇلتتىق سپورت تۇرلەرى تۋرالى جاڭا تۋىندىلاردى جازۋعا ىنتالاندىرۋ.

قازاقستان جازۋشىلار وداعى باسقارما ءتوراعاسى مەرەكە قۇلكەنوۆ كوركەم ادەبيەتتە ۇلتتىق مۇددەگە ساي كەلەتىن تۋىندىلاردىڭ ۇلەسىن ارتتىرۋ قاجەت ەكەنىن اتاپ ءوتتى.

«ونەردىڭ ىشىندەگى ەڭ ءبىر قاستەرلىسى - كوركەم ادەبيەت. سوندىقتان شىعارماشىلىق زيالى قاۋىم، جازۋشى قاۋىم وكىلدەرى ءۇشىن «قۇلاگەر» ادەبي بايقاۋىنىڭ ماڭىزى زور. وسكەلەڭ ۇرپاقتىڭ كىتاپ وقۋعا دەگەن قىزىعۋشىلىعىن وياتۋعا بار كۇش-جىگەرىمىزدى سالامىز»، - دەدى مەرەكە قۇلكەنوۆ.

ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ رەسپۋبليكالىق ادەبي بايقاۋدىڭ ماڭىزىنا توقتالدى.

«مەملەكەت باسشىسى قاسىم-جومارت كەمەل ۇلى توقايەۆ ۇلتتىق يدەولوگيا مەن جاڭا قوعامدىق ەتيكانى قالىپتاستىرۋعا باس نازار اۋدارعانى بەلگىلى. بۇل رەتتە بيىل وتەتىن 5-دۇنيەجۇزىلىك كوشپەندىلەر ويىندارى قارساڭىندا قالامگەرلەر اراسىندا «قۇلاگەر» رەسپۋبليكالىق بايقاۋىنىڭ جاريالانۋى قۋانىشتى جاڭالىق. ارينە، بايقاۋ اتاۋى كەزدەيسوق تاڭدالماعانى بەلگىلى. ويتكەنى ءىلياس جانسۇگىروۆتىڭ «قۇلاگەرى» - ەشقاشان ەسكىرمەيتىن، ماڭگى جاس پوەزيا. قازاق ادەبيەتىنە جاڭا ەسىمدەر مەن تىڭ تۋىندىلار قوسىلىپ، ۇلتتىق ادەبيەتىمىزدى بايىتا تۇسەدى دەگەن سەنىمدەمىن»، - دەدى يسلامبەك سالجانوۆ.