قازاقستاندا قاۋىن مەن قاربىز قانشا تۇرادى
استانا. KAZINFORM - ەلىمىزدە باقشا داقىلدارىنىڭ ماۋسىمى باستالدى. دۇكەن سورەلەرىندە قاۋىن مەن قاربىز قاپتاپ، سايكەسىنشە ءونىم باعاسى ارزانداي ءتۇستى. قىستا سىرتتان اكەلىنگەن قاربىزدىڭ كەلىسى 700 تەڭگە نەمەسە ودان دا جوعارى بولسا، قازىر باعاسى ايتارلىقتاي ارزانداعان. Kazinform اگەنتتىگىنىڭ ءتىلشىسى ەلىمىزدىڭ تۇكپىر-تۇكپىرىندەگى قاربىز مەن قاۋىننىڭ باعاسىنا ءۇڭىلىپ كوردى.
شىمكەنت پەن تۇركىستاندا قاربىزدىڭ كەلىسى 200-300 تەڭگە، ال قاۋىننىڭ باعاسى 200-500 تەڭگە. بۇل قالالارداعى قاۋىندار ەلىمىز بويىنشا ەڭ ارزان بولىپ سانالادى.
ال قىزىلوردادا قاۋىن باعاسى 1000-1300 تەڭگە تۇرادى. مۇنداعى قاربىزدار دا ەڭ ارزان ءونىم قاتارىندا. ءار كەلىسى 90 تەڭگەگە باعالانىپ وتىر.
اقتوبە، تاراز، اقتاۋ، قوستاناي، پەتروپاۆل، كوكشەتاۋ، قاراعاندى، سەمەي، جەزقازعان، تالدىقورعان، ورال، وسكەمەن، استانا جانە الماتى قالالارىندا قاربىزدىڭ كەلىسى 120-190 تەڭگە ارالىعىندا ساتىلادى. اتىراۋ مەن پاۆلوداردا باعا جوعارى. قاربىزدى كەم دەگەندە 200-250 تەڭگەگە ساتىپ الاسىز. ال، قونايەۆ قالاسىندا ەڭ قىمبات قاربىزدار ساتىلادى. ءار كەلىسىنە 500 تەڭگەدەن ساناپ بەرەسىز.
قاۋىننىڭ باعاسى قاربىزعا قاراعاندا قىمبات ەكەنى ايتپاسا دا تۇسىنىكتى. ايماقتار بويىنشا كەلىسىنە 200-600 ارالىعىندا اۋىتقيدى. قاۋىننىڭ ەڭ ارزانى - تالدىقورعان مەن تارازدا (180-200 تەڭگە). الماتى، اقتاۋ، اقتوبە، كوكشەتاۋ، وسكەمەن جانە استانادا 240-300 تەڭگەگە تەڭ. دەسە دە، ەلوردالىق ينتەرنەت- دۇكەندەر قاۋىننىڭ كەلىسىن 960 تەڭگەدەن ۇسىنىپ وتىر. قاۋىننىڭ باعاسى قونايەۆ، پەتروپاۆل، قاراعاندى، ورال، اتىراۋ، پاۆلودار، سەمەي قالالارىندا 450-500 تەڭگە ارالىعىندا ساتىلادى. قوستاناي مەن جەزقازعانداعى قاۋىندار ەڭ قىمباتى - ءار كەلىسىنە 590-600 تەڭگە جۇمسايسىز.
قاربىزدىڭ الەمدەگى ەڭ قىمبات سورتى - «دەنسۋكە» جاپونيادا وسىرىلەدى. ونىڭ ءتۇسى قارا، جولاقتارى جوق. ءدامى كادىمگى قاربىزعا ۇقسايدى. 2019 -جىلى 11 كەلىلىك «دەنسۋكە» اۋكتسيوندا 750 مىڭ جاپون يەنىنە نەمەسە 2,2 ميلليون تەڭگەگە ساتىلعانىن اتاپ وتكەن ءجون.
قاۋىننىڭ ەڭ قىمبات ءتۇرى «يۋباري كينگ» بولىپ سانالادى. جاپون بازارلارىندا ءبىر قاۋىننىڭ باعاسى 50-200 دوللارعا باعالانادى. 2019 -جىلى اۋكتسيونداردىڭ بىرىندە توكيونىڭ Pokka Sapporo Food جانە Beverage Ltd كومپانياسى 46 مىڭ دوللارعا، ياعني 19 ميلليون تەڭگەگە ەكى قاۋىن ساتىپ العان بولاتىن. يۋباري ءوسىرۋ كەزىندە جەمىستەرگە ماسساج جاسالىپ، ورنەك بىركەلكى جانە ايقىن بولۋى ءۇشىن قابىعى تەگىستەلەتىندىگىمەن تانىمال. ءدامى قاربىز مەن اناناس قوسپاسىنا ۇقسايدى.
ورالحان قوجانوۆ
