قازاقستاندا قاي كرەديت اۆتوماتتى تۇردە جويىلادى؟

استانا. قازاقپارات - 2023-جىلدان باستاپ قازاقستاندا قارجىلىق الاياقتىقپەن كۇرەسۋ ماقساتىندا ەرىكتى تۇردە كرەديتتەن باس تارتۋ شاراسى ەنگىزىلدى.

несие
Коллаж: Canva

ءاربىر ازامات قارىز الۋ مۇمكىندىگىنە شەكتەۋ قويۋ قۇقىعىنا يە. «ستوپ-كرەديت» قىزمەتى eGov سايتى مەن موبيلدى قوسىمشا ارقىلى قولجەتىمدى. بۇل قىزمەتتى قالاي پايدالانۋ كەرەكتىگىن قارجى نارىعىن رەتتەۋ جانە دامىتۋ اگەنتتىگى (ق ن ر د ا) ءتۇسىندىردى.

قىزمەتتى كومپيۋتەر ارقىلى پايدالانۋ ءۇشىن كەلەسى قادامداردى ورىنداۋ قاجەت

egov.kz سايتىنا كىرىپ، جەكە كابينەتكە تىركەلۋ؛

«قىزمەتتەر» بولىمىندە «بانكتىك قارىزدار مەن ميكروكرەديتتەردى الۋدان ەرىكتى تۇردە باس تارتۋ» قىزمەتىن تاڭداپ، ونلاين تاپسىرىس بەرۋ؛

بارلىق مىندەتتى ورىستەردى تولتىرىپ، ەلەكتروندىق ساندىق قولتاڭبا (ە ت س ق) ارقىلى ءوتىنىمدى قول قويۋ؛

جەكە كابينەتتە «قىزمەتتەردى الۋ تاريحى» بولىمىندە سۇراۋ ناتيجەسى تۋرالى حابارلامامەن تانىسۋ.

موبيلدى قوسىمشا ارقىلى قىزمەتتى پايدالانۋ ءۇشىن

eGov موبيلدى قوسىمشاسىن اشۋ؛

«قىزمەتتەر» بولىمىندە «سالىقتار مەن قارجى» ءبولىمىن تاڭداۋ؛

«بانكتىك قارىزدار مەن ميكروكرەديتتەردى الۋدان ەرىكتى تۇردە باس تارت» ءبولىمىن تاڭداڭىز؛

قاجەتتى دەرەكتەردى تولتىرىپ، سۇراۋدى ەلەكتروندى تۇردە قول قويىڭىز.

«وسىدان كەيىن ءسىزدىڭ كرەديتتىك تاريحىڭىزدا قارىز الۋ قۇقىعىنان باس تارتقانىڭىز تۋرالى بەلگى پايدا بولادى. كرەديتتىك ۇيىمدار كرەديتتىك بيۋرولاردان اقپارات سۇراتقاندا، بۇل شەكتەۋ كورىنىپ، قارىز بەرۋ تۋرالى شەشىم قابىلدانبايدى. ەگەر ءسىزدىڭ كەلىسىمىڭىزسىز قارىز راسىمدەلسە، جەكە شەكتەۋگە قاراماستان، قارىز اۆتوماتتى تۇردە جويىلادى»، - دەپ حابارلادى ق ن ر د ا.

بۇل قىزمەتتى كەز كەلگەن ۋاقىتتا ءوشىرىپ تاستاۋ وڭاي. سونىمەن قاتار بۇل شەكتەۋ لومباردتار مەن ءوز كليەنتتەرىنىڭ كرەديتتىك تاريحىن باعالامايتىن باسقا ۇيىمدارعا قاتىستى ەمەس. 2024-جىلدىڭ 30-جەلتوقسانىنا دەيىن «ستوپ-كرەديت» قىزمەتىن 920 مىڭنان استام ازامات پايدالانعان.

سوڭعى جاڭالىقتار