قازاقستاندا قانشا قار بارىسى تىرشىلىك ەتەدى

استانا. KAZINFORM - قازاقستاندا قار بارىسى مەكەندەيتىن جەرلەردىڭ %70 ەرەكشە قورعالاتىن اۋماقتار. بۇل تۋرالى ەكولوگيا جانە تابيعي رەسۋرستار ءمينيسترى ەرلان نىسانبايەۆ ايتىپ بەردى.

ەلىمىزدە قار بارىسىنىڭ نەگىزگى تىرشىلىك ەتۋ ۋچاسكەلەرىندە 3,6 ميلليون گەكتار ەرەكشە قورعالاتىن تابيعي اۋماقتار قۇرىلدى.

اتاپ ايتقاندا، ىلە الاتاۋى، كولساي كولدەرى، التىنەمەل، سايرام-وگەم، جوڭعار الاتاۋى، شارىن، تارباعاتاي، قاتونقاراعاي، قاراتاۋ جانە باتىس التاي اۋماقتارى بار.

- بارىستاردى ەسەپكە الۋ جانە زاماناۋي مونيتورينگ جۇرگىزۋ ادىستەرى، فوتوتۇزاقتار مەن سپۋتنيكتىك تەلەمەتريا بەلسەندى قولدانىلادى. 11 بارىس سپۋتنيكتىك ارنايى مويىن قارعىسىمەن تاڭبالاندى، الداعى ۋاقىتتا ەرەكشە قورعالاتىن تابيعي اۋماقتار جەلىسىن جەتىلدىرۋ جوسپارلانىپ وتىر، - دەدى مينيستر ۇكىمەت ۇيىندە وتكەن باسپا ءسوز ءماسليحاتىندا.

وتكەن عاسىردا 80-جىلداردىڭ باسىندا قازاقستانداعى بارىستار سانى 180-200 دەپ بەلگىلەنسە، 90-جىلدارى 80-100 باسقا دەيىن ازايعان ەدى.

- قابىلدانعان شارالاردىڭ ناتيجەسىندە ولاردىڭ سانى 90-جىلدارداعى ەڭ تومەنگى دەڭگەيدەن ەكى ەسەگە ارتىپ، 180 گە دەيىن جەتتى. جانۋاردىڭ بۇل ءتۇرىن ساقتاپ قالۋ جۇمىستارى جالعاسۋدا، ترانسشەكارالىق جانە حالىقارالىق ىنتىماقتاستىق بەلسەندى دامىپ كەلەدى، - دەدى ە. نىسانبايەۆ.

بۇعان دەيىن ەرلان نىسانبايەۆ قازاقستانعا نيدەرلاندىدان جەتكىزىلگەن جولبارىستاردىڭ العاشقى قىسى قالاي ءوتىپ جاتقانىن ايتىپ بەردى.