قازاقستاندا قانشا مەشىت بار؟

استانا. KAZINFORM - ەلىمىزدە ق م د ب-عا فيليال بولىپ تىركەلگەن 2752 مەشىت بار. سايرام اۋدانى اقسۋكەنت اۋىلىندا 300 ادامدىق مەشىت اشىلدى، دەپ حابارلايدى Inbusiness.kz سايتى Otyrar.kz-كە سىلتەمە جاساپ.

ءدىني عيماراتتىڭ اشىلۋ راسىمىنە قىزىلوردا، قاراعاندى، تەمىرتاۋ، اقمولا وبلىستارىنان كەلگەن تۇرعىنداردان باسقا، وزبەكستاننان كەلگەن قوناقتار قاتىسقان. مەشىتتىڭ قۇرىلىسى جەتى اي بويى جۇرگىزىلدى. قارجىنى جەرگىلىكتى مەتسەنات بولگەن.

جالپى ەلىمىزدە ءدىني عيمارات سانى - 3776، ونىڭ ىشىندە 2834 مەشىت بار. باس ءمۇفتي ناۋرىزباي قاجى تاعان ۇلى ق م د ب-عا فيليال بولىپ تىركەلگەن 2752 مەشىت بار ەكەنىن ايتادى.

«ونىڭ 20 سى - وبلىستىق، ايماقتىق ورتالىق مەشىت، 418 ى - قالالىق مەشىت، 173 ى - اۋداندىق مەشىت جانە 2141 سى - اۋىلدىق مەشىت. سونداي-اق ەلىمىز بويىنشا جالپى 447 نامازحانا بار»، - دەپ دەرەك كەلتىرىلگەن باس ءمۇفتيدىڭ جازباسىندا.