قازاقستاندا قانشا ادام نەسيەسىن ارەڭ تولەپ ءجۇر؟

قارجى نارىعىن رەتتەۋ جانە دامىتۋ اگەنتتىگى ءتوراعاسىنىڭ ورىنباسارى ولجاس قيزاتوۆ ەلىمىزدە قانشا ادام نەسيەسىن كەشىكتىرىپ تولەيتىنىن ايتتى

ونىڭ ايتۋىنشا، اگەنتتىك ميكروقارجىلىق ۇيىمدار، بانكتەر جانە كوللەكتورلاردىڭ بالانسىندا بەرەشەگىن 90 كۇننەن كەشىكتىرىپ تولەگەن قانشا قارىز الۋشى بارىن انىقتاۋ ءۇشىن تالداۋ جۇرگىزگەن.

«وسىلايشا، 1,5 ميلليون ادام نەسيەسىن ۋاقىتىندا تولەي الماي جۇرگەنىن انىقتادىق. ولاردىڭ ميكروقارجىلىق ۇيىمدار مەن بانكتەردە نەسيەسى بار. تولەنبەگەن نەسيەنىڭ ءبىر بولىگى كوللەكتورلارعا بەرىلگەن. وسىدان كەيىن ءاربىر بانك، ميكروقارجىلىق ۇيىم جانە كوللەكتورلىق اگەنتتىكپەن جەكە جوسپار قۇردىق. ناتيجەسىندە ناقتى قارىز الۋشىلاردىڭ ءتىزىمىن جاسادىق. ءاربىر بانك جانە ميكروقارجىلىق ۇيىممەن بورىشتىڭ جۇكتەمەسىن قالاي تومەندەتۋگە بولاتىنىن انىقتادىق»، - دەدى ولجاس قيزاتوۆ و ق ك- دە وتكەن باسپا ءسوز ءماسليحاتىندا.

اگەنتتىك وكىلى ماسەلەنى شەشۋدىڭ جولدارىن ۇسىندى.

«بورىشكەردىڭ نەسيەنى تولەۋگە مۇمكىندىگى بولماسا، ءبىز بانك جانە ميكروقارجىلىق ۇيىممەن اقىلداسىپ، نەسيەنى كەشىرۋ جاعىن قاراستىرامىز. ەگەر قارىز الۋشىنىڭ قارجىلىق مۇمكىندىگى بولسا، ءبىراق ونىڭ قارجىلىق جاعدايى تومەندەمەس ءۇشىن ءبىز بانكتەرمەن بىرلەسىپ، نەسيەنى قايتا قۇرىلىمداۋ جاعىن پىسىقتايمىز. 2024-جىلدىڭ سوڭىنا دەيىن بارلىق 1,5 ميلليون اداممەن (بانكتەر جانە ميكروقارجىلىق ۇيىمدار) نەسيە جۇكتەمەسىن ازايتۋ ءۇشىن جۇمىس جۇرگىزۋى كەرەك»، - دەدى ول.

ولجاس قيزاتوۆ قازاقستاندا پروبلەمالىق قارىزى بار ادامدارىڭ سانى ارتپاۋى ءۇشىن زاڭعا شەكتەۋ ەنگىزىلەتىنىن ايتتى.

«الداعى ۋاقىتتا بەرەشەگىن ارەڭ تولەيتىن جاڭا قارىز الۋشىلار بولماۋى ءۇشىن ءبىز قارىز الۋشى پروبلەمالىق نەسيەسىن تولىق جاپپايىنشا وعان جاڭا كرەديت الۋعا زاڭمەن تىيىم سالۋدى ۇسىنامىز. مىسالى، قارىز الۋشىنىڭ باسقا بانكتە نەمەسە ميكروقارجىلىق ۇيىمدا مەرزىمى ءوتىپ كەتكەن كرەديتى بولسا، وندا ول پروبلەمالىق نەسيەسى جابىلعانعا دەيىن جاڭا كرەديت الۋىنا زاڭمەن تىيىم سالىنادى. سونداي-اق، ءبىز تۇتىنۋشىلىق نەسيەنىڭ ماكسيمالدى مولشەرىن شەكتەگىمىز كەلەدى. بۇل قارىز 100 ميلليون تەڭگەدەن اساتىن سوماعا ءجيى بەرىلەتىنىن كورىپ وتىرمىز. كەيدە قارىز 1 ميلليارد تەڭگەگە دەيىن جەتەدى. بۇل كاسىپكەرلىك ماقساتتا الىنعان قارىز بولۋى مۇمكىن. ءبىز حالىقتىڭ بەرەشەگىن كوبەيتپەس ءۇشىن تۇتىنۋشىلىق قارىزدىڭ جوعارعى دەڭگەيىن شەكتەگىمىز كەلەدى»، - دەدى ورىنباسار.

Massaget.kz