قازاقستاندا قانشا ادام ءومىر بويىنا باس بوستاندىعىنان ايىرىلعان؟
استانا. قازاقپارات - قازىر «قارا بۇركىتتە» ءومىر بويىنا سوتتالعان قانشا ادام جازاسىن وتەپ وتىر؟ ق ا ج ك وكىلدەرى ءتىلشىنىڭ رەسمي ساۋالىنا جاۋاپ بەردى.
«قارا بۇركىتتە» قانشا ادام وتىر؟
قىلمىستىق- اتقارۋ جۇيەسى كوميتەتىنىڭ مالىمەتىنشە، قازاقستاندا ءومىر بويىنا باس بوستاندىعىنان ايىرىلعان 200 گە جۋىق ادام بار. ولار قوستاناي وبلىسىنداعى №39-مەكەمەدە («قارا بۇركىت») وتىرادى.
ايتا كەتەيىك، بىلتىر قاجك «قارا بۇركىتتە» ءومىر بويىنا سوتتالعان 180 ادام وتىرعانىن حابارلادى.
«قارا بۇركىتتە» قانشا ادام جۇمىس ىستەيدى؟
قاجك وكىلدەرى «قارا بۇركىتتەگى» كۇن ءتارتىبى قالاي وتەتىنىن ايتتى. رەسمي جاۋاپقا سۇيەنسەك، قازاقستانداعى باسقا تۇزەتۋ مەكەمەسىندەگىلەرمەن بىردەي.
مەكەمەدە مەكتەپ تە جۇمىس ىستەيدى.
«مەكەمەدە جۇمىس نىساندارى بار، وندا 90-عا جۋىق سوتتالعان جۇمىسقا ورنالاسقان»، - دەپ جازىلعان ق ا ج ك- نىڭ Massaget.kz-كە جاۋابىندا.
سوتتالعاندارعا ءبىر كۇنگە قانشا تەڭگە بولىنەدى؟
قىلمىستىق- اتقارۋ جۇيەسى كوميتەتىنىڭ رەسمي جاۋابىنا سۇيەنسەك، ءبىر سوتتالعانعا تاۋلىگىنە جۇمسالاتىن شىعىن - ورتاشا ەسەپپەن 2654 تەڭگە. كوميتەت بۇل شىعىن «قارا بۇركىتتە» وتىرعاندارعا دا، ايىپتالۋشىلارعا دا قاتىستى ەكەنىن راستادى.
«بۇل سوماعا تاماقتانۋ، كيىم-كەشەك، توسەك-ورىن جابدىقتارى، گيگيەنا قۇرالدارى، كوممۋنالدىق قىزمەتتەر، سوتتالعانداردى ەتاپپەن جونەلتۋ، بوساتىلاتىن سوتتالعانداردىڭ جول ءجۇرۋى كىرەدى»، - دەپ جازىلعان جاۋاپتا.
«قارا بۇركىتتە» وتىرعاندار جاقىندارىمەن تىلدەسە الا ما؟
كوميتەت مالىمەتىنشە، ءومىر بويىنا سوتتالعاندارعا قىلمىستىق-اتقارۋ زاڭناماسىنا سايكەس كەزدەسۋلەرگە، حات جازۋعا جانە تاكسوفون ارقىلى سويلەسۋگە رۇقسات ەتىلەدى.
انىقتاما: قازاقستاندا ەرەكشە قورعالاتىن باس بوستاندىعىنان ايىرۋ ورىندارىنىڭ ءبىرى - «قارا بۇركىت». ول قوستاناي وبلىسىندا ورنالاسقان، رەسمي اتاۋى - №39-مەكەمە. جۇرتشىلىققا «قارا بۇركىت» دەگەن اتپەن تانىس.
مۇندا ءومىر بويى باس بوستاندىعىنان ايىرىلعاندار جازاسىن وتەيدى: تەرروريستەر، كىسى ولتىرۋشىلەر جانە پەدوفيلدەر.
