قازاقستاندا قانشا ادام ءولىم جازاسىنا كەسىلگەنى بەلگىلى بولدى
باس پروكۋراتۋرا 2023 -جىلعى ۇكىمدەر تۋرالى مالىمەتتى ۇسىندى. Tengrinews.kz رەسمي ساۋالىنا باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتى 2023 -جىلدىڭ 9 ايىندا قازاقستان سوتتارى 242 ادام اقتالىپ، 9 ادام ءومىر بويىنا باس بوستاندىعىنان ايىرۋ جازاسىنا كەسىلگەنىن (زاڭدى كۇشىنە ەنگەن ۇكىمدەر نەگىزىندە) ايتتى.
ءومىر بويىنا باس بوستاندىعىنان ايىرىلعان 9 ادام: قىلمىستىق كودەكستىڭ 99-بابى بويىنشا، ادام ءولتىرۋ - 5 ادام، قىلمىستىق كودەكستىڭ 120-بابى بويىنشا، زورلاۋ - 1 ادام، قىلمىستىق كودەكستىڭ 121-بابى بويىنشا، سەكسۋال سيپاتتاعى زورلىق-زومبىلىق جاساعانى ءۇشىن - 3 ادام ءومىر بويىنا باس بوستاندىعىنان ايىرىلعان.
«سوتتالعاندار تۋرالى قولدا بار مالىمەتتەرگە سايكەس، 1994 -جىلدان بەرى زاڭدى كۇشىنە ەنگەن ۇكىمدەر بويىنشا 73 ادام ءولىم جازاسىنا كەسىلگەن»، - دەلىنگەن جاۋاپتا.
ەسكە سالايىق، قازاقستاندا ءولىم جازاسىن قولدانۋ ق ر پرەزيدەنتىنىڭ 2003 -جىلعى 17-جەلتوقسانداعى ءتيىستى موراتوريي ەنگىزۋ تۋرالى جارلىعىمەن توقتاتىلعان.
