قازاقستاندا قانداي اۆتوبولشەكتەر شىعارىلادى
استانا. KAZINFORM - ەلىمىزدە اۆتوكولىك قۇرالدارىنا ارنالعان اۆتوكومپونەنتتەر مەن قوسالقى بولشەكتەر ءوندىرىسى لوكاليزاتسيالانعان. بۇل تۋرالى اۆتوموبيل نارىعىن مونيتورينگىلەۋ جانە تالداۋ اگەنتتىگىنىڭ ديرەكتورى ارتۋر ميسكاريان ايتىپ بەردى.
«قازاقستاندىق اۆتو نارىقتى قوسالقى بولشەكتەر مەن اۆتوكومپونەنتتەردى دامىتۋ الاڭى رەتىندە قاراستىراتىن كوپتەگەن وندىرۋشىلەر مەن كومپانيالار بار»، - دەدى ارتۋر ميسكاريان ەلوردادا ءوتىپ جاتقان «Automechanika Astana» كورمەسىندە.
ساراپشىنىڭ ايتۋىنشا، قازاقستاندا كولىك قۇرالدارىنا ارنالعان اۆتوكومپونەنتتەر مەن قوسالقى بولشەكتەر ءوندىرىسى لوكاليزاتسيالانعان. اتاپ ايتقاندا، اۋا جانە ماي سۇزگىلەرى، باتارەيالار، سورۋ جۇيەلەرى، بامپەرلەر، پوليۋرەتاندى توسەنىشتەر جانە پلاستيكالىق بولشەكتەر، مەديا، ورىندىقتار، ديسكىلەر، شينالار، سيليندر باستارى، مەحانيكالىق رەدۋكتورلار تاعى سول سياقتى.
سونىمەن قاتار، وتاندىق ءوندىرىستىڭ اۆتوكومپونەنتتەرى قازاقستاندىق زاۋىتتاردا جاڭا كولىك قۇرالدارىنا ورناتىلادى.
بۇعان دەيىن جەڭىل اۆتو كولىك ساراپشىسى قازاقستاندا قىتاي اۆتوموبيلدەرى يمپورتىنىڭ ارتۋىنا قاتىستى پىكىر ءبىلدىردى.
ايتا كەتەيىك، ەلوردادا «Automechanika Astana» اتتى حالىقارالىق اۆتوكورمە ءوتىپ جاتىر. ول اۆتوموبيل ونەركاسىبىنىڭ، ديلەرلىك ورتالىقتاردىڭ، قىزمەت كورسەتۋ جانە جوندەۋ سەگمەنتتەرىنىڭ وكىلدەرىن بىرىكتىرەتىن حالىقارالىق پلاتفورما.
ءۇش كۇنگە (17-19-ءساۋىر) سوزىلاتىن اۆتوكورمەگە 20 ەلدەن اۆتوكومپانيا مەن ونىڭ وكىلدەرى قاتىسىپ جاتىر.
