قازاقستاندا ەندى لەگيونەرلەرگە مەملەكەتتەن قارجى بولىنبەيدى

استانا. KAZINFORM - ءماجىلىس قابىلداعان دەنە شىنىقتىرۋ جانە سپورت ماسەلەلەرى بويىنشا زاڭعا قازاقستان ازاماتتىعى جوق سپورتشىلاردى بيۋجەت قاراجاتى ەسەبىنەن جانە كۆازيمەملەكەتتىك سەكتور سۋبەكتىلەرىنىڭ قاراجاتى ەسەبىنەن قارجىلاندىرۋعا تىيىم سالۋ تۋرالى وزگەرىس ەنگىزىلدى.

سس
Фото: Midjourney нейрожелісі

وسىعان وراي ەندى مەملەكەت لەگيونەرلەرگە قارجى بولمەيدى. بۇل نورما مەملەكەتتىك قاراجاتتى ءتيىمدى پايدالانۋ ماقساتىندا ازىرلەندى.

«دەپۋتاتتار ەنگىزگەن تاعى ءبىر ماڭىزدى وزگەرىس، قازاقستاننىڭ اقشاسىن اساۋدى بىلگەنمەن الاڭدا ۇلكەن جەتىستىك جاساۋدى بىلمەگەن لەگيونەرلەرگە مەملەكەتتىڭ بيۋجەتى ەسەبىنەن دە، كۆازيمەملەكەتتىك سەكتوردىڭ بيۋجەتى ەسەبىنەن دە قارجى بولۋگە تىيىم سالاتىن نورما قابىلداندى»، - دەدى ءماجىلىس دەپۋتاتى نارتاي سارسەنعاليەۆ.

بۇل رەتتە دەنە شىنىقتىرۋ جانە سپورت سالاسىنداعى مەملەكەتتىك مەكەمەلەر اقىلى قىزمەت كورسەتۋگە جانە ولاردان تۇسەتىن كىرىستى بيۋجەت زاڭناماسىنا سايكەس پايدالانۋ مۇمكىندىگىنە يە بولادى.

سپورت مەكەمەلەرى ءىس-شارالاردى (سپورتتىق جارىستار، سەمينارلار، كەڭەستەر مەن كونفەرەنسيالار) ۇيىمداستىرۋ جانە وتكىزۋ ماقساتىمەن حالىقتى ارنايى سپورتتىق جابدىقتارمەن، دەنە شىنىقتىرۋ-ساۋىقتىرۋ جانە سپورت وبەكتىلەرىمەن قامتاماسىز ەتۋ بويىنشا قىزمەتتەر، سپورتتىق مەديتسينا سالاسىنداعى قىزمەتتەر ارقىلى تابىس تابا الادى.

سوڭعى جاڭالىقتار