قازاقستاندا ەندى ەشكىمنىڭ كرەديتى كەشىرىلمەيدى

несие
Фото: Фото: Кazinform

قازاقستاندا ەندى ەشكىمنىڭ كرەديتى كەشىرىلمەيدى. بۇل تۋرالى قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى مادينا ءابىلقاسىموۆا ايتتى.

«2019-جىلى كرەديت كەشىرىلگەننەن كەيىن ەلىمىزدىڭ قارجى سەكتورىندا كرەديت كولەمى قايتادان ءوستى. ونىڭ ىشىندە پروبلەمالىق كرەديتتەر دە ارتتى. ەگەر مەملەكەت قاراجاتىن ءبولىپ، قايتا-قايتا (قازاقستاندىقتاردىڭ كرەديتىن - ەسك.) كەشىرە بەرسەك، جاڭا كرەديتتەر كوبەيەدى»، - دەدى ءتوراعا ماجىلىستەگى پارلامەنتتىك تىڭداۋدان سوڭ.

وسىعاي بايلانىستى قازاقستاندا كوللەكتورلىق اگەنتتىكتەردىڭ جاۋاپكەرشىلىگى كۇشەيمەك.

«ەندى ولار زاڭ بويىنشا پروبلەمالىق بەرەشەكتى رەتتەۋدىڭ مىندەتتى ءراسىمىن جاساۋى كەرەك. ەگەر قارىز الۋشى بانككە جۇگىنسە، ول وسىنداي ءراسىمدى وتكىزۋگە ءتيىس. بيىلدان باستاپ ءراسىمدى جۇيەلى تۇردە قولدانۋ ءۇشىن پرەزيدەنتتىڭ تاپسىرماسى بويىنشا بارلىق بانك پەن ميكروقارجى، كوللەكتورلىق ۇيىم جەكە جوبالارىن ازىرلەيدى»، - دەدى مادينا ءابىلقاسىموۆا.

ول پروبلەمالىق نەسيەلەردى قايتارۋ بويىنشا جەكە جوسپار دايىندالعانىن مالىمدەدى.

«جالپى 1 ميلليون 449 مىڭ ادامدى قامتۋ جوسپارلانعان. بۇل جوسپارلار جاڭارتىلادى. ونىڭ ىشىندە بانكتەردىڭ كرەديتتەردى قايتا قۇرىلىمداۋى، قارىزدى ءىشىنارا نەمەسە تولىق ەسەپتەن شىعارۋ شارالارى بار. مىسالى، ادامنىڭ تولەۋگە قابىلەتى جوق بولسا نەمەسە قارىزدىڭ سوماسى قاتتى ۇلكەن بولماسا، بىرنەشە جىلعا سوزىلعان پروبلەمالىق كرەديتى بولماسا، وندا بانكتەر ءوز ەسەبىنەن (قارىزدى - ەسك.) ءىشىنارا نەمەسە تولىق جاۋىپ تاستايدى»، - دەدى ءتوراعا.

ەسكە سالايىق، بۇعان دەيىن ەلدە پروبلەمالىق قارىزى بار تۇرعىنداردىڭ سانى ءوسىپ جاتقانى حابارلانعان ەدى.

Massaget.kz

سوڭعى جاڭالىقتار