قازاقستاندا «مەيىرىمدىلىك اپتالىعى» باستالدى

استانا. KAZINFORM - قازاقستاندا «يگى ىستەر مارافونى» رەسپۋبليكالىق جوباسى اياسىندا 20-26 - ءساۋىر ارالىعىندا وتەتىن «مەيىرىمدىلىك اپتالىعى» باستاۋ الدى، دەپ حابارلايدى مادەنيەت جانە اقپارات مينيسترلىگىنىڭ باسپا ءسوز قىزمەتى.

ۆەدومستۆو مالىمەتىنشە، باستاما ۆولونتەرلىك پەن قايىرىمدىلىق مادەنيەتىن دامىتۋعا باعىتتالعان.

- ءبىر اپتا بويى ەل كولەمىندە مەملەكەتتىك ورگاندار، ءبىلىم بەرۋ جانە مەديتسينالىق مەكەمەلەر، ۇكىمەتتىك ەمەس ۇيىمدار مەن ۆولونتەرلەردىڭ قاتىسۋىمەن ءتۇرلى يگى ءىس-شارالار مەن اكسيالار وتكىزىلەدى. اسىرەسە، الەۋمەتتىك تۇرعىدان وسال توپتارعا قولداۋ كورسەتۋگە، جانۋارلارعا جاۋاپكەرشىلىكپەن قاراۋعا جانە قورشاعان ورتانى قورعاۋعا باسا ءمان بەرىلەدى، - دەلىنگەن حابارلامادا.

جوبا قازاقستاندىقتاردى يگى ىستەرگە جۇمىلدىرىپ، قوعامداعى بىرلىكتى نىعايتۋدى، قايىرىمدىلىق پەن ادامگەرشىلىك قۇندىلىقتارىن كەڭىنەن دارىپتەۋدى كوزدەيدى. رەسپۋبليكا بويىنشا ءىس- شارالارعا مىڭداعان ادام قاتىسپاق.

«كىشكەنتاي قادام - ۇلكەن وزگەرىس!» ۇرانىمەن جۇزەگە اسىپ جاتقان باستاما ءار ادامنىڭ ۇلەسى ماڭىزدى ەكەنىن ايقىندايدى.

اكسياعا كەز كەلگەن ادام الەۋمەتتىك جەلىلەردە ءوز يگى ىستەرىمەن ءبولىسىپ، #يگىىستەرمارافونى2026, #مارافوندوبرىحدەل2026 جانە #MarathonOfGoodDeeds2026 حەشتەگتەرىن بەلگىلەۋ ارقىلى قوسىلا الادى.

وسىدان بۇرىن قازاقستاندا ەرىكتىلەرگە ارنالعان «مەيىرىم» وردەنى پايدا بولعانىن جازعانبىز.