قازاقستاندا موپەد مىنگەندەر جۇرگىزۋشى كۋالىگىن الىپ، ساقتاندىرۋ پوليسىن راسىمدەيدى

استانا. KAZINFORM - قازاقستاندا موپەد تىزگىندەگەندەر جۇرگىزۋشى كۋالىگىن الىپ، ساقتاندىرۋ پوليسىن راسىمدەۋ ءتيىس بولادى.

«قازىرگى كەزدە ىشكى ىستەر مينيسترلىگى (پارلامەنت ءماجىلىسى دەپۋتاتتارىنىڭ باستاماسىمەن ازىرلەنگەن) ءتيىستى زاڭ جوباسىنىڭ تالقىلاۋىنا قاتىسىپ جاتىر. قۇجاتتا موپەدتەردى جول ءجۇرىسى قاۋىپسىزدىگىن قامتاماسىز ەتۋ بويىنشا ۋاكىلەتتى مەملەكەتتىك ورگاندا مەملەكەتتىك تىركەۋگە جاتاتىن كولىك قۇرالدارىنىڭ تىزبەسىنە ەنگىزۋ ۇسىنىلدى. سونىمەن قاتار، موپەدتەردى مەحانيكالىق كولىكتەرگە تەڭەستىرۋ، مەحانيكالىق كولىك قۇرالدارىنىڭ جۇرگىزۋشىلەرىنە قويىلاتىن تالاپتارعا سايكەس موپەد جۇرگىزۋشىلەرىنىڭ قۇقىقتارى مەن مىندەتتەرىن ايقىنداۋ ەسكەرىلگەن»، - دەلىنگەن ىشكى ىستەر مينيسترلىگىنىڭ Kazinform اگەنتتىگىنە بەرگەن جاۋابىندا.

مۇنىمەن قوسا، موپەد جۇرگىزۋشىلەرىنە «A1» ساناتىنداعى جۇرگىزۋشى كۋالىگىنىڭ بولۋى تۋرالى (16 جاستان باستاپ بەرىلەدى) تالاپ قويۋ ۇسىنىلدى. بۇل ءوز كەزەگىندە ءاربىر موپەدتى تىركەۋگە جانە تيىسىنشە ولاردىڭ جۇرگىزۋشىلەرىنە مەحانيكالىق كولىك قۇرالدارىنىڭ جۇرگىزۋشىلەرى ءۇشىن قاراستىرىلعان تالاپتاردى قويۋعا مۇمكىندىك بەرەدى. وسى رەتتە، جۇرگىزۋشى كۋالىگىن الۋ، ساقتاندىرۋ ءپوليسىن راسىمدەۋ، كولىك قۇرالىنا تەحنيكالىق تەكسەرۋ جۇرگىزۋ جانە باسقا دا ماسەلەلەر شەشىلەدى.

«اتالعان زاڭ جوباسى قابىلدانعاننان كەيىن موپەد جۇرگىزۋشىلەرى جولداعى كولىك قوزعالىسى ەرەجەلەرىن بۇزعانى ءۇشىن مەحانيكالىق كولىك قۇرالدارىنىڭ جۇرگىزۋشىلەرىنە ۇقساس جاۋاپكەرشىلىككە تارتىلادى. ياعني موپەد جۇرگىزۋشىسى مەحانيكالىق كولىك قۇرالدارىنىڭ جۇرگىزۋشىلەرىنە جۇكتەلگەن جاۋاپكەرشىلىكتىڭ بارلىق سپەكترىن كوتەرەدى»، - دەپ اتالىپ وتكەن ۆەدومستۆو اقپاراتىندا.

ايتا كەتەيىك، جاقىندا پارلامەنت ءماجىلىسى «جول ءجۇرىسى تۋرالى» زاڭىنا جەكەلەگەن كولىك قۇرالدارى تۇرلەرىنىڭ ءجۇرۋىن ۇيىمداستىرۋ جانە جول قاۋىپسىزدىگىن سيفرلاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءبىرىنشى وقىلىمدا قارادى.

زاڭ جوباسىندا قوزعالتقىشىنىڭ كولەمى 50 تەكشە سانتيمەتردەن از موپەد سياقتى كولىك قۇرالدارىن تىركەۋ ەسكەرىلگەن.

اۆتور
رۋسلان عابباسوۆ