قازاقستاندا موبيلدى اۋدارىمدارعا قاتىستى قاتاڭ تەكسەرىس باستالدى

استانا. KAZINFORM - قازاقستاندا موبيلدى اۋدارىمدارعا قاتىستى تەكسەرۋلەر باستالدى. قارجى مينيسترلىگىنىڭ مەملەكەتتىك كىرىستەر كوميتەتى ازاماتتارعا سالىق ورگاندارىنان حابارلاما كەلگەن جاعدايدا قانداي ارەكەت جاساۋ كەرەگىن ءتۇسىندىردى.

تەكسەرۋلەر قاشان باستالدى؟

زاڭعا سايكەس، بيىلعى جىلدىڭ 1-قاڭتارىنان باستاپ بانكتەر قازاقستاندىقتاردىڭ قارجىلىق وپەراتسيالارى تۋرالى مالىمەتتەردى مەملەكەتتىك كىرىستەر ورگاندارىنا ۇسىنۋعا مىندەتتى.

ءبىرىنشى توقسان بويىنشا موبيلدى اۋدارىمدار مەن باسقا دا وپەراتسيالاردى تەكسەرۋ 15-ساۋىردەن كەيىن باستالدى. قارجى مينيسترلىگىنىڭ مالىمەتىنشە، كامەرالدىق باقىلاۋ جانە ىقتيمال زاڭ بۇزۋشىلاردىڭ ءتىزىمىن جاساۋ ءساۋىر ايىنىڭ سوڭىنا دەيىن جالعاسادى. وسىدان كەيىن نەگىز بولسا، ازاماتتارعا حابارلامالار جىبەرىلەدى.

قاۋىپ ايماعىنا كىمدەر كىرەدى؟

سالىق ورگاندارىنىڭ نازارىنا كەلەسى ءۇش تالاپتىڭ بارلىعى بىردەي سايكەس كەلگەن ازاماتتار ىلىگۋى مۇمكىن:

100 نەمەسە ودان دا كوپ ءارتۇرلى ادامنان موبيلدى اۋدارىم الۋ؛

بۇل وپەراتسيالار 3 اي ىشىندە جاسالۋى؛

جالپى سوما 1020000 تەڭگەدەن اسۋى.

ماڭىزدىسى - وسى ءۇش كريتەريدىڭ ءبارى قاتار ورىندالۋى ءتيىس. سوندا عانا ازاماتقا جاعدايدى تۇزەتۋ قاجەتتىگى تۋرالى حابارلاما جولدانۋى مۇمكىن.

ەگەر سالىقتان حابارلاما كەلسە نە ىستەۋ كەرەك؟

حابارلاما العان ازاماتقا ونى ورىنداۋ ءۇشىن تابىس ەتىلگەن كۇننەن باستاپ 30 جۇمىس كۇنى بەرىلەدى.

ەگەر كەلىسسەڭىز:

قاتەلەردى تۇزەتۋ؛

ءتيىستى كەزەڭگە ناقتىلانعان سالىق ەسەپتىلىگىن تاپسىرۋ؛

قاجەت بولسا سالىقتار مەن الەۋمەتتىك تولەمدەردى تولەۋ؛

ءوزىن-ءوزى جۇمىسپەن قامتىعاندار ءۇشىن مالىمەتتەردى قوسىمشادا كورسەتۋ؛

باسقا سالىق رەجيمىنە اۋىسساڭىز، ءتيىستى راسىمدەردى ورىنداۋ.

ەگەر كەلىسپەسەڭىز:

سالىق ورگانىنا جازباشا تۇسىنىكتەمە جولداپ، انىقتالعان ايىرماشىلىقتاردىڭ نە سەبەپتى زاڭ بۇزۋشىلىق ەمەس ەكەنىن كورسەتۋ قاجەت.

ەگەر ءىشىنارا كەلىسسەڭىز:

كەلىسەتىن بولىگىن تۇزەتۋ؛

قالعان بولىگى بويىنشا تۇسىنىكتەمە بەرۋ.

تۇسىنىكتەمەدە نە كورسەتىلۋى كەرەك؟

ءوز دەرەكتەرىڭىز جانە سالىق ورگانىنىڭ دەرەكتەرى؛

حابارلامانىڭ ءنومىرى مەن كۇنى؛

كەلىسپەۋ سەبەپتەرى؛

كۇنى مەن قولىڭىز؛

راستايتىن قۇجاتتار (بار بولسا).

ۋاقىتىندا جاۋاپ بەرمەسەڭىز نە بولادى؟

ەگەر بەلگىلەنگەن مەرزىمدە جاۋاپ بەرىلمەسە نەمەسە تۇسىنىكتەمە جەتكىلىكسىز دەپ تانىلسا، سالىق ورگانى قوسىمشا تەكسەرۋ جۇرگىزۋى مۇمكىن.

جاڭا تالاپتاردىڭ ماقساتى قانداي؟

مەملەكەتتىك كىرىستەر كوميتەتىنىڭ ايتۋىنشا، جاڭا ەرەجەلەردىڭ ماقساتى - كاسىپكەرلىكپەن اينالىسىپ، تابىسىن جاسىرعان جانە سالىق تولەمەيتىن ازاماتتاردى انىقتاۋ. ۆەدومستۆو مالىمەتىنشە، موبيلدى اۋدارىمدار بەيرەسمي ەسەپ ايىرىسۋدىڭ ەڭ كەڭ تارالعان تاسىلدەرىنىڭ بىرىنە اينالعان.