قازاقستاندا مەملەكەتتىك باعدارلامالار بويىنشا جالعا بەرىلگەن باسپانانى ساتىپ الۋ قۇقىعى بەرىلەدى

استانا. KAZINFORM - بۇعان دەيىن قازاقستاندىقتار مەملەكەتتىك باعدارلامالار بويىنشا الىنعان جالعا بەرىلەتىن باسپانانى ساتىپ الا المايتىن. قازىر ونىڭ تەتىگى وزگەرىپ جاتىر.

ياعني، قازاقستاندىقتارعا جالعا بەرىلەتىن باسپانانى ساتىپ الۋ قۇقىعى بەرىلەدى. بۇل تۋرالى پرەمەر-ءمينيستردىڭ ءبىرىنشى ورىنباسارى رومان سكليار ايتتى.

«ونەركاسىپ جانە قۇرىلىس مينيسترلىگى بۇل ماسەلەنى پىسىقتاپ جاتىر جانە جاقىن ارادا قۇجات قابىلدانىپ، جاريالانادى. الايدا، وسىعان قاتىستى 2016-جىلى شەشىم قابىلدانعان ەدى. بۇل رەتتە، جەكەشەلەندىرۋ مۇمكىن ەمەس، ياعني ساتىپ الۋ قۇقىعىنسىز جالعا بەرىلەتىن تۇرعىن ۇيلەر بار. ەندى تاسىلدەر وزگەرەدى. سوندىقتان ۆەدومستۆو وسى تەتىكتى پىسىقتايدى. اتاپ ايتقاندا، وسى باعىتتا ءتيىستى ەرەكشەلىكتەردى نازارعا الىپ، وڭىرلەردەگى جاعدايدى قاراستىرۋ كەرەك»، - دەپ ءتۇسىندىردى رومان سكليار.

پرەمەر-ءمينيستردىڭ ءبىرىنشى ورىنباسارى ساتىپ الۋ قۇقىعى بەرىلەتىنىن، تەتىكتىڭ ءوزى جاقىن ارادا ەگجەي-تەگجەيلى قارالاتىنىن ناقتىلادى.