قازاقستاندا ەلەكتروندىق ساۋدانى دامىتۋ جوسپارى قايتا جاڭارتىلادى

استانا. KAZINFORM - ۇكىمەت باسشىسى ولجاس بەكتەنوۆ ەلەكتروندىق ساۋدانى دامىتۋداعى 2027 - جىلعا دەيىنگى جوسپاردى قايتا قاراۋدى تاپسىردى.

Қазақстанда электрондық сауданы дамыту жоспары қайта жаңартылады
Фото: freepik.com

- ساۋدانىڭ دامۋى كولىك، لوگيستيكا جانە قويما ينفراقۇرىلىمىنا تىكەلەي بايلانىستى. ساۋدا جانە ينتەگراتسيا مينيسترلىگى مۇددەلى مەملەكەتتىك ورگاندارمەن جانە بيزنەس قوعامداستىقپەن بىرلەسىپ، ناۋرىز ايىنىڭ سوڭىنا دەيىن ەل ىشىندە، سول سياقتى حالىقارالىق دەڭگەيدە تاۋارلاردى جەتكىزۋدىڭ ءتيىمدى تىزبەگىن قالىپتاستىرۋى قاجەت، - دەدى ولجاس بەكتەنوۆ ۇكىمەت وتىرىسىندا.

سونداي- اق، پرەمەر- مينيستر مۇددەلى مەملەكەتتىك ورگانداردىڭ «سيفرلىق قازاقستان» قاۋىمداستىعىمەن بىرلەسىپ، ەلەكتروندىق كوممەرتسيانى دامىتۋدى مەملەكەتتىك قولداۋدىڭ قوسىمشا شارالارىن ازىرلەۋدى تاپسىردى.

- ەلەكتروندىق ساۋدانى دامىتۋدىڭ 2027- جىلعا دەيىنگى جوسپارى قابىلدانعان بولاتىن. الايدا، ونى وتاندىق بيزنەستىڭ ۇسىنىستارىن جانە ماركەتپلەيستەرمەن جۇمىس تاجىريبەسىن ەسكەرە وتىرىپ جاڭارتۋ قاجەتتىگى تۋىنداپ وتىر. بۇل جۇمىستى ناۋرىزدىڭ سوڭىنا دەيىن اياقتاۋ قاجەت، - دەيدى ول.

بۇعان دەيىن ولجاس بەكتەنوۆ ماركەتپلەيستەردەگى تاۋارلاردىڭ ساپاسىنا قاتىستى سۇراقتىڭ كوپتىگىن ايتقان ەدى.

ايتا كەتەيىك، ەلىمىزدە بازارلار مەن دۇكەندەردىڭ قىزمەتىن سيفرلاندىرۋ جوسپارلانىپ وتىر.

سوڭعى جاڭالىقتار