قازاقستاندا گۇلدىڭ باعاسى قانشاعا قىمباتتادى؟
استانا. KAZINFORM - ناۋرىز مەيرامى جاقىنداپ كەلەدى. بۇل مەرەكەدە ايەلدەرگە گۇل سىيلايدى. الايدا ەلىمىزدە ءبىر جىل ىشىندە گۇلدىڭ باعاسى قىمباتتاعان، - دەپ حابارلايدى Energyprom.
بيىل قاڭتاردىڭ سوڭىندا قازاقستاندا وسىمدىكتەر مەن گۇلدەردىڭ باعاسى ءبىر جىل ىشىندە 8,2 پايىز قىمباتتادى.
وڭىرلەر بويىنشا باعانىڭ ەڭ كوپ ءوسىمى قاراعاندى وبلىسىندا بايقالدى. وڭىردە ءبىر جىلدا ايتارلىقتاي، ياعني 41,5 پايىزعا قىمباتتاعان. ودان كەيىن گۇلدەردىڭ باعاسى الماتى وبلىسىندا (18,1 پايىز) جانە استانادا (14,5 پايىز) قىمباتتادى. ەڭ از جىلدىق باعا ءوسىمى الماتى قالاسىندا تىركەلدى: 1,3 پايىز. اقمولا، جامبىل جانە جەتىسۋ وبلىستارىندا باعا بىلتىرعى قاڭتارداعى دەڭگەيدە ساقتالدى. تاعى ەكى وڭىردە باعا تومەندەدى: پاۆلودار وبلىسىندا - ءبىر جىلدا 0,9 پايىز، ۇلىتاۋ وبلىسىندا - 6,1 پايىز ارزاندادى.
بۇكىل الەمگە تانىمال راۋشان گۇلدەرى قاڭتار ايىندا قر اۋىل شارۋاشىلىعى بازارلارىندا ءبىر دانا ورتاشا ەسەپپەن 946 تەڭگەدەن ساتىلدى. ەڭ قىمبات اباي وبلىسىندا: 1,4 مىڭ تەڭگە. قوستاناي (1,3 مىڭ تەڭگە) جانە شىعىس قازاقستان (1,2 مىڭ تەڭگە) وبلىستارىندا ءسال ارزانىراق. شىمكەنتتە ەڭ ارزان: بار بولعانى 600 تەڭگە. باتىس قازاقستان وبلىسىندا راۋشان گۇلى 648 تەڭگە، قىزىلوردادا 667 تەڭگە.
2023-جىلى قازاقستاندا 17,6 ميلليون گۇل جينالعان. گۇلدەر ەلىمىزدىڭ 20 ءوڭىرىنىڭ 13 دە ءوسىرىلىپ، جينالعان.
الماتى وبلىسىندا ەڭ كوپ گۇل جينالدى: 7,8 ميلليون دانا، جىلدىق ءوسىم 10,9 ەسە. ودان كەيىن اقمولا (5,3 ميلليون دانا) جانە قاراعاندى (2,2 ميلليون دانا) وبلىستارى.
