قازاقستاندا كىم ءتىسىن تەگىن ەمدەتە الادى
پەتروپاۆل. KAZINFORM - شۇعىل كومەككە مۇقتاج سىرقاتتار ۋچاسكەلىك دارىگەردەن جولداما الماي-اق تىكەلەي ستوماتولوگيالىق مەكەمەلەرگە جۇگىنە الادى.
قازاقستاندا شۇعىل ستوماتولوگيالىق كومەك كەلەسى ساناتتاعى ازاماتتارعا كورسەتىلەدى:
- 18 جاسقا دەيىنگى بالالار
- جۇكتى ايەلدەر
- وتان سوعىسىنىڭ ارداگەرلەرى
- I ،II جانە III توپتاعى مۇگەدەكتەر
- «التىن القا» جانە «كۇمىس القا» العان كوپبالالى انالار
- اتاۋلى الەۋمەتتىك كومەك الۋشىلار
- جاسى بويىنشا شىققان زەينەتكەرلەر
- جۇقپالى جانە الەۋمەتتىك ماڭىزى بار اۋرۋلارى، سونداي-اق اينالاسىنداعىلارعا قاۋىپ توندىرەتىن اۋرۋلارى بار پاتسيەنتتەر
- مۇگەدەكتىگى بار نەمەسە بالا كەزىنەن I توپتاعى مۇگەدەكتىگى بار بالاعا كۇتىم جاسايتىن جۇمىس ىستەمەيتىن ازاماتتار.
دارىگەردەن جولداما الماي-اق كەلەسى پروتسەدۋرالاردى الۋعا بولادى:
- كۇردەلى كاريەستى، پۋلپيتتى، پەريودونتيتتى ەمدەۋ
- كۇردەلى تىستەردى، سونىڭ ىشىندە دانالىق تىستەردى جۇلعىزۋ
- ابستسەسستەردى اشۋ جانە ودونتوگەندى كيستالاردى جويۋ
- شىققان جاقتى ورنىنا قويۋ
- قاتەرسىز ءوسىندى- ىسىكتەردى جويۋ (مىسالى، ەپۋليس)
- جاراقات العان كەزدە قوزعالعان ءتىستى ۋاقىتشا ورنىنا كەلتىرۋ
- ءتىل جۇگەنشىگى نەمەسە ەرىن پلاستيكاسى
جوسپارلى ستوماتولوگيالىق كومەك مىنالاردى قامتيدى:
- پروفيلاكتيكالىق تەكسەرۋلەر جانە تىستەردى تازالاۋ
- كاريەستى ەمدەۋ (كومپوزيتتىك ماتەريالداردان جاسالعان پلومبالاردى قولدانا وتىرا)
- قاراپايىم جانە كۇردەلى ءتىستى جۇلۋ
- جۇيكەنى (ءتىس ۇلپاسىن) الىپ تاستاۋ
- گينگيۆيت، ستوماتيت جانە قىزىل يەكتىڭ باسقا قابىنۋىن ەمدەۋ
ورتودونتيالىق كومەك جاق سۇيەگىنىڭ تۋا بىتكەن اۋىتقۋلارى بار (تاڭداي جىرىعى، تىستەۋ قابىلەتى دۇرىس جەتىلمەگەن) جانە ءتىس-جاق دەفورماتسيالارى بار 6 جاستان 12 جاسقا دەيىنگى از قامتىلعان وتباسىلاردان شىققان بالالارعا كورسەتىلەدى.
شۇعىل كومەك - كەز كەلگەن ۋاقىتتا جولداماسىز كورسەتىلەدى. جوسپارلى كومەك الۋ ءۇشىن ءتىس دارىگەرىنە جازىلۋ قاجەت. ەگەر دارىگەر ەمحانادا امبۋلاتوريالىق جاعدايدا كومەك كورسەتۋ مۇمكىن ەمەس دەپ ساناسا، ناۋقاس جەدەل جاردەممەن اۋرۋحاناعا جىبەرىلەدى.
ەستەرىڭىزگە سالا كەتەيىك، قازاقستاندىقتار جەكە كۋالىكتى ونلاين اۋىستىرا الادى.
اۆتور
اقەركە داۋرەنبەك قىزى
