تۇركىستاندىق ارۋ ءورت ءسوندىرۋ- قۇتقارۋ سپورتىنان الەم چەمپيونى اتاندى

  تۇركىستاندا ءورت ءسوندىرۋ- قۇتقارۋ سپورتىنان الەم چەمپيونى اتانعان ايدانا تۇرسىن وبلىستىق توتەنشە جاعدايلار دەپارتامەنتىندە جۇمىس ىستەيدى.

ول 17 جاسىنان باستاپ جەڭىل اتلەتيكامەن اينالىسادى، دەپ حابارلايدى Kazinform تۇركىستان وبلىسىنىڭ وڭىرلىك كوممۋنيكاتسيالار قىزمەتىنە سىلتەمە جاساپ.

ول العاش رەت قۇتقارۋشىلار اراسىنداعى ەل بىرىنشىلىگىندە توپ جارعان. بىلتىر وزبەكستاننىڭ سامارقان قالاسىندا الەم چەمپيونى اتاندى. ال بيىل تۇركيادا وتكەن جارىستا كەدەرگىلەرمەن 100 مەتر قاشىقتىقتى 16 سەكۋندتا جۇگىرىپ ءوتىپ، ەكىنشى ورىندى يەلەنگەن. سول باسەكەدە 2-قاباتقا 7 سەكۋندتا ساتىمەن كوتەرىلىپ، قازاقستان رەكوردىن جاڭارتتى.

جاس قۇتقارۋشى ەرلەرمەن يىق تىرەستىرە جاتتىعۋ جاساپ، شەبەرلىگىن شىڭدايدى. ونىڭ تۇركيادا وتكەن الەم چەمپيوناتىندا 2-قاباتقا ساتىمەن كوتەرىلگەن ءساتى الەۋمەتتىك جەلىدە كەڭىنەن تارالىپ، «ورمەكشى قىز» دەگەن لاقاپ اتپەن كوپشىلىككە تانىمال.

- ادامدا ءبىرىنشى كەزەكتە ءتارتىپ، ودان كەيىن الدىندا ماقساتى بولۋى كەرەك. ماقساتى بولعان كەزدە بارلىعىنا ۋاقىت تابىلادى. الەۋمەتتىك جەلىلەردە تۇركيادا وتكەن جارىستىڭ بەينەسى ارقىلى كوپشىلىك «ورمەكشى قىز» دەپ تانىپ جاتادى. بۇل ماعان شابىت سىيلايدى، - دەيدى ايدانا تۇرسىن.

وسىعان دەيىن تۇركىستاندىق ايدانا تۇرسىندى كوپشىلىك «ورمەكشى قىز» دەپ اتايتىنىن جازدىق.