قازاقستاندا كوممۋنالدىق قىزمەتتەر تاعى قىمباتتايدى

استانا. قازاقپارات – قازاقستاندا كوممۋنالدىق قىزمەتتەردىڭ تاريفتەرى وسەدى. بۇل تۋرالى ۇلتتىق ەكونوميكا ۆيتسە-ءمينيسترى ارمان قاسەنوۆ ۇكىمەتتە وتكەن بريفينگتە مالىمدەدى.

ونىڭ ايتۋىنشا، تاريفتەردىڭ ءوسۋى «مينيمالدى» بولادى.

«تاريفتەردە مينيمالدى ءوسۋ جۇزەگە اسىرىلادى. ءبىز بۇل ەسەپتەۋلەردى بۇرىننان جاسادىق. بۇل بولجامدار ەمەس، ءبارى تالداۋعا نەگىزدەلگەن. ءبىز تاريفتەردىڭ قانداي پايىزعا وسەتىنىن بىلەمىز جانە بۇل ەڭ از ءوسىم بولاتىنىنا كەپىلدىك بەرەمىز»، - دەدى ارمان قاسەنوۆ.

ۆيتسە-مينيستر ناقتى سيفرلاردى اتاعان جوق. ءبىراق باعالار ءاربىر تابيعي مونوپوليا سۋبەكتىسىندە ءارتۇرلى ەكەنىن العا تارتتى.

«ينفلياتسيالىق سەبەت بىرنەشە جۇزدەگەن ءونىمدى قامتيدى. ءار ەلەمەنتتىڭ اسەرى مينيمالدى. سونىمەن قاتار بىزدە شەكتى توبە بار: ەگەر اسەردىڭ بەلگىلى ءبىر شەكتەن اساتىنىن كورسەك، وندا تاريفتەردىڭ ءوسۋىن شەكتەيمىز»، - دەپ اتاپ ءوتتى ۆيتسە-مينيستر.

ەستەرىڭىزگە سالا كەتەيىك، وتكەن جىلدىڭ جەلتوقسانىندا پرەمەر-مينيستر ولجاس بەكتەنوۆ ۇلتتىق ەكونوميكا مينيسترلىگىنە جانە سالالىق مەملەكەتتىك ورگاندارعا كوممۋنالدىق قىزمەتتەر مەن تاريفتەردىڭ نەگىزسىز ءوسۋىن باقىلاۋدى تاپسىرعان بولاتىن.