قازاقستاندا كولىكتى قايتا جابدىقتاۋ ءراسىمى جەڭىلدەتىلۋى مۇمكىن
استانا. KAZINFORM - قازاقستاندا اۆتوكولىكتەردى قايتا جابدىقتاۋعا رۇقسات الۋ ءتارتىبىن جەڭىلدەتۋ جوسپارلانىپ وتىر. ىشكى ىستەر مينيسترلىگى بۇل باعىتتاعى وزگەرىستەردى قوعامدىق تالقىلاۋعا ۇسىندى.
كۇتىلىپ وتىرعان باستى جاڭالىقتىڭ ءبىرى - ءبىرقاتار قۇجاتتاردى سيفرلىق فورماتقا كوشىرۋ.
«اشىق ن ق ا» پورتالىندا اۆتوكولىكتەر مەن تىركەمەلەردى قايتا جابدىقتاۋ جونىندەگى كۋالىكتەردى بەرۋ تارتىبىنە وزگەرىستەر ەنگىزۋ تۋرالى بۇيرىق جوباسى جاريالاندى.
جوبانىڭ نەگىزگى ماقساتى - راسىمدەۋ پروتسەسىن اۆتوماتتاندىرۋ. ەگەر وزگەرىستەر قابىلدانسا، جۇرگىزۋشىلەر كەيبىر انىقتامالار مەن قۇجاتتاردى قاعاز تۇرىندە تاپسىرۋدان بوساتىلادى. مەملەكەتتىك ورگاندار قاجەتتى مالىمەتتەردى اقپاراتتىق جۇيەلەر ارقىلى ءوزارا الماسۋ نەگىزىندە الادى.
سونداي-اق قۇجات قولدانىستاعى زاڭناماعا سايكەستەندىرىلىپ، قىزمەت كورسەتۋ مەرزىمى قىسقارىپ، راسىمدەۋ ءتارتىبى ىڭعايلىراق بولادى دەپ كۇتىلۋدە.
2026-جىلى قانداي قۇجاتتار قاجەت بولادى؟
كولىكتى قايتا جابدىقتاۋ راسىمىنەن وتكىزۋ ءۇشىن ازامات ارنايى ح ق ك و- عا كونسترۋكتسياسىنا وزگەرىس ەنگىزىلگەن اۆتوكولىكتى اپارىپ، ءوتىنىش بەرەدى.
وتىنىشكە تومەندەگى قۇجاتتار قوسا تىركەلەدى:
كولىك قۇرالىنىڭ كونسترۋكتسياسىنا وزگەرىس ەنگىزۋ مۇمكىندىگى مەن ءتارتىبى تۋرالى اكىمشىلىك پوليتسيانىڭ اۋماقتىق بولىمشەلەرى بەرەتىن قورىتىندى؛
پايدالانىلعان بولشەكتەر مەن كومپونەنتتەردىڭ سايكەستىك سەرتيفيكاتتارىنىڭ كوشىرمەلەرى (بار بولسا)؛
تەحنيكالىق قىزمەت كورسەتۋ ستانسياسى بەرەتىن اتقارىلعان جۇمىستاردىڭ كولەمى مەن ساپاسى تۋرالى دەكلاراتسيا؛
اككرەديتتەلگەن سىناق زەرتحاناسى بەرەتىن قاۋىپسىزدىك تەكسەرۋ حاتتاماسى؛
تەحنيكالىق بايقاۋ ورتالىعى راسىمدەيتىن دياگنوستيكالىق كارتا
قانداي وزگەرىستەر قايتا جابدىقتاۋ بولىپ سانالادى؟
تومەندەگى وزگەرىستەر رەسمي تۇردە قايتا جابدىقتاۋ رەتىندە ەسەپتەلەدى:
زاۋىتتا قاراستىرىلماعان شاتىر باگاجنيگىن ورناتۋ؛
تىركەمە تارتۋعا ارنالعان فاركوپتى نەمەسە الدىڭعى قورعانىش تەمىر دوعاسىن ورناتۋ؛
اسپانى (پودۆەسكا) كوتەرۋ نەمەسە تومەندەتۋ، ياعني ليفت جاساۋ؛
ءوندىرۋشى قاراستىرماعان قوسىمشا جارىق شامدارىن ورناتۋ.
مۇنداي وزگەرىستەر مىندەتتى تۇردە زاڭداستىرىلۋى ءتيىس. بۇل جول قوزعالىسى قاۋىپسىزدىگىن قامتاماسىز ەتۋگە جانە تەحنيكالىق تالاپتاردىڭ ساقتالۋىنا قاجەت. زاڭسىز وزگەرتىلگەن كولىك ايىپپۇلعا نەمەسە تىركەۋدەن باس تارتۋعا اكەلۋى مۇمكىن.
بۇعان دەيىن ەگەر كولىكتە مىندەتتى جابدىقتار بولماسا، جۇرگىزۋشىگە ايىپپۇل سالىنۋى مۇمكىن ەكەنى تۋرالى جازدىق.
