قازاقستاندا ەڭ كوپ ساتىلعان اۆتوكولىك تۇرلەرى بەلگىلى بولدى

استانا. قازاقپارات - 2025-جىلدىڭ ناۋرىزىندا قازاقستاندا جاڭا اۆتوموبيلدەردى ساتىپ الۋ كورسەتكىشى 23,4 پايىزعا ءوستى.

- ناۋرىز ايىندا 19629 جەڭىل اۆتوموبيل مەن كوممەرتسيالىق تەحنيكالار ساتىلدى، بۇل بىلتىرعى ۇسقاس كەزەڭمەن سالىستىرعاندا 23,4 پايىز جوعارى كورسەتكىش. جالپى، بيىلعى ءبىرىنشى توقساندا 46843 جاڭا اۆتوموبيل وتكىزىلدى، ال بىلتىر 39439 جاڭا كولىك ساتىلدى (18,8+ پايىز)، - دەلىنگەن «قازاقستاننىڭ اۆتوكولىك وداعى» (ق ا و) مالىمەتىندە.

ەڭ كوپ وتكەن (توپ-10) اۆتوموبيلدەر كوشىن ادەتتەگىدەي Hyundai (4472 كولىك؛ بىلتىرعى ناۋرىزبەن سالىستىرعاندا 32,8+ پايىز) باستادى. Chevrolet (2738) ەكىنشى ورىندا تۇر (99,3+ پايىز)، ال ءۇشىنشى قاتارداعى Kia ديلەرلەرى 2120 كولىك ساتقان (17,1+ پايىز). سونىمەن قاتار، Jetour وسىمەن ەكىنشى اي قاتارىنان ءتورتىنشى ساتىعا تۇراقتادى (1362؛ 74,4 پايىز). ال بەسىنشى ورىن 1350 اۆتوموبيلى وتكەن Chery گە بۇيىردى (2,7 پايىز).

ودان بولەك تىزىمگە Haval (1288؛ 14,6 پايىز)، Jac (1071؛ 54,3 پايىز)، Geely (1021؛ 45,6 پايىز)، Toyota (862؛ 21,2 پايىز) جانە Changan (703؛ 42,1 پايىز) ەندى.

بۇدان بولەك، ناۋرىز ايىندا ەڭ تانىمال بولعان توپ-10 مودەل اراسىندا Chevrolet Cobalt (2236 كولىك) ءبىرىنشى تۇر. سودان كەيىن تىزىمدە Hyundai Tucson (1692) ،Kia Sportage (1 090)، Hyundai Mufasa (955) ،Haval M6 (607) ،Chery Tiggo 2 (532) ،Hyundai Elantra (529)، Hyundai Santa Fe (524) ،Geely Emgrand (493) جانە Jac S3 (461) بار.

جالپى، بيىلعى ءبىرىنشى توقساننىڭ قورىتىندىسى بويىنشا برەندتەر قاتارىندا Hyundai (11705 كولىك؛ 26,2 پايىز) كوش باستادى. ەكىنشى ورىنعا 6009 اۆتوموبيلى ساتىلعان Chevrolet شىقسا (80,1 پايىز)، ۇشتىكتى Kia (4905؛ 0,6 پايىز) تۇيىندەدى. ال Jetour ديلەرلەرى 3103 ماشينانىڭ كىلتىن تاپسىرسا (61,2 پايىز)، بەسىنشى ساتىداعى Chery- دىڭ 3097 مودەلى ءوتتى (10 پايىز).

بۇعان دەيىن ەلىمىزدە قانشا اۆتوكولىك بار ەكەنىن جازعان ەدىك.