قازاقستاندا كاسپي تەڭىزىنىڭ عىلىمي-زەرتتەۋ ينستيتۋتى قۇرىلادى
استانا. KAZINFORM - ق ر ۇكىمەتى كاسپي تەڭىزىنىڭ عىلىمي-زەرتتەۋ ينستيتۋتىن قۇرۋ تۋرالى قاۋلىنى بەكىتتى - دەپ حابارلايدى ق ر سۋ رەسۋرستارى جانە يرريگاتسيا ءمينيسترىنىڭ باسپا ءسوز قىزمەتى.
عىلىمي-زەرتتەۋ ينستيتۋتى كاسپي تەڭىزىنىڭ ەكولوگيالىق، سۋ دەڭگەيىنىڭ تومەندەۋ پروبلەماسىن، يتبالىقتار مەن بالىقتاردىڭ جاپپاي قىرىلۋ سەبەپتەرىن، كاسپي يتبالىقتارىنىڭ پوپۋلياتسياسىن ساقتاۋ ماسەلەلەرىن، يحتيوفاۋنانى، كاسپي سۋ ايدىنى مەن جاعالاۋىن زەرتتەيتىن بولادى. سونداي-اق، كاسپي اۋماعىنداعى شەكارالاس مەملەكەتتەردەگى ارىپتەستەرىمەن ءوزارا تىعىز ءىس-قيمىلدى قامتاماسىز ەتەتىن بولادى.
ينستيتۋت كاسپي تەڭىزىنىڭ ەكوجۇيەسى تۋرالى شىنايى جانە جان-جاقتى اقپارات بەرەدى. بۇل دەرەكتەر مەملەكەتتىك جانە جەرگىلىكتى اتقارۋشى ورگانداردىڭ كەشەندى شارالار قابىلداۋىنا نەگىز بولادى. عىلىمي ۇيىم قۇرۋ سونىمەن قاتار كاسپييدى ساقتاۋ جونىندەگى حالىقارالىق جانە ۇلتتىق مىندەتتەمەلەردى تولىق كولەمدە ورىنداۋعا مۇمكىندىك بەرەدى.
«وسىعان دەيىن مەملەكەت باسشىسى تەڭىزدى ساقتاۋ ماقساتىندا كاسپيدى زەرتتەۋمەن اينالىساتىن عىلىمي ينستيتۋت قۇرۋ جونىندە تاپسىرما بەرگەن بولاتىن. مۇنداي ۇيىمدار كاسپي ماڭىنداعى باسقا ەلدەردە دە بار. ينستيتۋتتى قۇرۋ بار پروبلەمالاردى كەشەندى تۇردە زەرتتەۋگە، اۋقىمدى مىندەتتەردى شەشۋگە، حالىقارالىق ىنتىماقتاستىقتى كۇشەيتۋگە مۇمكىندىك بەرەدى»، - دەدى ق ر سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
