قازاقستاندا جۇمىسسىزدىق دەڭگەيى فرانسيا، فينليانديادان دا تومەن بە
استانا. KAZINFORM - قازاقستاندا رەسمي دەرەك بويىنشا جۇمىسسىزدىق كورسەتكىشى 5 پايىزعا جەتپەيدى.
ورتالىق كوممۋنيكاتسيالار قىزمەتى الاڭىندا «حالىقتى جۇمىسپەن قامتۋ» تاقىرىبىندا وتكەن باسپا ءسوز ءماسليحاتىندا كەلەسى سۇراق قويىلدى: نەلىكتەن فينليانديا نەمەسە فرانسيادا جۇمىسسىزدىق دەڭگەيى 8 پايىزدان جوعارى، ال بىزدە 4,6 پايىز؟ بۇل ەلدەردە مەملەكەتتىك ورگاندار ناشار جۇمىس ىستەي مە، الدە بىزدە ەسەپتەۋ ءادىسى باسقا ما؟
- ءيا، راسىمەن وتكەن جىلدىڭ قورىتىندىسى بويىنشا جۇمىسسىزدىق دەڭگەيى %4,6 قۇرادى. بۇل كورسەتكىشكە ءبىزدىڭ مينيسترلىك، ءوڭىر اكىمدىكتەرى مەن ينۆەستيتسيالىق جوبالاردى جۇزەگە اسىرۋدىڭ ارقاسىندا قول جەتكىزىلدى. بۇل ماقساتتا 6 باعىت بويىنشا شارالار بار، - دەپ جاۋاپ بەردى ەڭبەك جانە حالىقتى الەۋمەتتىك قورعاۋ ۆيتسە-ءمينيسترى اسقار بياحمەتوۆ.
ۆيتسە-ءمينيستردىڭ مالىمدەۋىنشە، بىلتىر ەل اۋماعىندا 979 مىڭ ازامات جۇمىسپەن قامتىلدى، ونىڭ ىشىندە 714 مىڭ ادام تۇراقتى جۇمىس تاپتى.
سونداي-اق ەلدەگى جۇمىسسىزدىق كورسەتكىشىنە قاتىستى مينيسترلىككە قاراستى حالىقتى جۇمىسپەن قامتۋ دەپارتامەنتىنىڭ ديرەكتورى ازيز يبراگيموۆ ويىن ورتاعا سالدى. ونىڭ ايتۋىنشا، رەسمي جۇمىسسىزدىققا قاتىستى ەسەپتى ۇلتتىق ستاتيستيكا بيۋروسى جۇرگىزەدى.
- تىركەلگەن جۇمىسسىزدىق دەگەن ۇعىم بار، ياعني ادامدار جۇمىسسىز رەتىندە تىركەلىپ، ودان ءارى كومەككە جۇگىنەدى، سونداي-اق تىركەلمەگەن جۇمىسسىزدىق بار، ياعني جۇمىسسىز رەتىندە تىركەلمەگەن. سوندىقتان بۇل ماسەلە مەملەكەتتىڭ جۇمىسسىزدىق ەسەبىنە قاتىستى قولداناتىن ادىستەمەسىمەن بايلانىستى، - دەيدى ول.
بۇعان دەيىن حابارلاعانىمىزداي بىلتىر ەلىمىزدە 714 مىڭ ادام تۇراقتى جۇمىسپەن قامتىلدى.
ايتا كەتسەك، 2031-جىلعا قاراي ەلىمىزدە 1,6 ميلليون كادر قاجەت.
