قازاقستاندا جۇمىس ىستەمەيتىن جانە وقىمايتىن قانشا جاس بار؟

Фото: elements.envato.com
Фото: elements.envato.com

استانا. KAZINFORM - بۇگىندە ەلىمىزدە NEET ساناتىنداعى شامامەن 400 مىڭ جاس بار. بۇل تۋرالى ءماجىلىس دەپۋتاتى جيگۋلي دايرابايەۆ ايتتى.

دەپۋتاتتىق ساۋال پرەمەر-مينيستر ولجاس بەكتەنوۆكە جولداندى.

«رەسپۋبليكا بويىنشا NEET ساناتىنداعى ياعني جۇمىس ىستەمەيتىن جانە وقىمايتىن جاستاردىڭ ۇلەسى - %7,1 نەمەسە 379 مىڭنان اسا ادام. اۋىل جاستارىنىڭ وسى ساناتتا ايتارلىقتاي ۇلەسى بار ەكەنىن تۇسىنەمىز. جاستار تابىس ىزدەپ، 3 ۇلكەن ءىرى «ماگنيت» قالاعا استانا، استانا جانە شىمكەنتكە ۇمتىلادى. مىسالى، جىل سايىن ەلورداعا 30 مىڭنان اسا ادام كوشىپ كەلەدى. كوشى-قون اعىنىنىڭ نەگىزگى ۇلەسىن ەڭبەك تاجىريبەسى مەن پراكتيكالىق داعدىسى جوق اۋىل جاستارىنا تيەسىلى. ادەتتە، ولار قالادا ۋاقىتشا جانە جالاقىسى تومەن جۇمىستاردا ىستەپ، قۇرىلىس الاڭدارى مەن بازارلاردا ءناپاقا ىزدەپ ءجۇر. بۇل اۋىل جاستارىن قارىزعا يتەرمەلەپ، الەۋمەتتىك تۇراقتىلىققا كەرى اسەرىن تيگىزۋى مۇمكىن»، - دەدى جيگۋلي دايرابايەۆ.

ونىڭ ايتۋىنشا، 2029-جىلعا قاراي NEET ساناتىنداعى جاستاردىڭ ۇلەسىن 2 ەسە تومەندەتۋگە تاپسىرما بەرىلگەن.

«بۇگىندە استانا قالاسىنىڭ اكىمى جەڭىس قاسىمبەكتىڭ جەتەكشىلىگىمەن پيلوتتىق رەجيمدە باعىت-باعدارى جوق اۋىل جاستارى ءۇشىن «جول تاپ» جوباسى ىسكە اسىرىلىپ جاتىر. ەلوردادا سۇرانىسقا يە ەلەكتر گازبەن دانەكەرلەۋشى، تىگىنشى، ۆيدەومونتاجداۋ، گرافيكالىق ديزاين سياقتى 13 سيفرلىق داعدى مەن جۇمىسشى ماماندىقتارى بويىنشا تەگىن قىسقا مەرزىمدى وقىتۋ ۇيىمداستىرىلعان. ءارى قاراي جۇمىسقا ورنالاستىرۋعا جاردەم بەرىلەدى. جوبا وڭ ناتيجە بەرىپ ۇلگەردى. 7 ايدا 7 مىڭعا جۋىق ادام جوبا مۇمكىندىگىن پايدالاندى.1200 دەن اسا ادام وقىتۋدان ءوتىپ، 1100 ادام جۇمىسقا ورنالاستىرىلدى. جوبانىڭ ايرىقشا ەرەكشەلىگى حالىقپەن بەلسەندى جۇمىس ىستەۋدە بولدى. جوبانىڭ الگوريتمى ءوز تيىمدىلىگىن كورسەتتى»، - دەدى دەپۋتات.

جيگۋلي دايرابايەۆ «اۋىل» پارتياسى جوبانى قولدايتىنىن اتاپ ءوتىپ، ونى باسقا وبلىستارعا ەنگىزۋدى ۇسىندى.

«ويتكەنى، بۇل جوبا پرەزيدەنتتىڭ NEET جاستارىنىڭ ۇلەسىن ازايتۋ جونىندەگى تاپسىرماسىن ىسكە اسىرۋدا ءتيىمدى قۇرال بولا الادى. 2023-جىلى ۇكىمەت وتىرىسىندا وڭىرلەردەگى اكىمدىكتەرگە «جول تاپ» پيلوتتىق جوباسىنىڭ مىسالىن قولدانۋعا تاپسىرما بەرىلگەن ەدى. وكىنىشكە قاراي جارتى جىل ۋاقىت وتسە دە وڭىرلەردە جاستار اراسىنداعى جۇمىسسىزدىقپەن كۇرەستە اتالعان باعدارلاما تاسىلدەرى قولعا الىنباي وتىر. ولجاس اباي ۇلى، قالالارعا كەلگەن اۋىل جاستارىن جۇمىسپەن قامتۋدى ىنتالاندىرۋ ءۇشىن ۇكىمەت تاراپىنان قابىلدانعان شەشىمگە تاعى دا قوسىمشا سەرپىن بەرۋىڭىزدى سۇرايمىن»، - دەدى دەپۋتات.

Massaget.kz

سوڭعى جاڭالىقتار