قازاقستاندا جەمقورلىق جايلى حابارلاعاندار 13 ميلليون تەڭگەگە دەيىن سىياقى الادى
وتكەن جىلى 134 قازاقستاندىق سىبايلاس جەمقورلىق تۋرالى حابارلاعانى ءۇشىن سىياقى الدى، ونىڭ تورتەۋى - ماڭعىستاۋ وبلىسىنىڭ تۇرعىندارى.

بەلسەندى ازاماتتىق ۇستانىمى ءۇشىن ولارعا 800 مىڭ تەڭگەدەن استام قارجى تولەنگەن. بۇل تۋرالى سىبايلاس جەمقورلىققا قارسى ءىس-قيمىل كوميسسياسىنىڭ وتىرىسىندا بەلگىلى بولدى، دەپ حابارلايدى قازاقپارات ماڭعىستاۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.
ماڭعىستاۋ وبلىسى سىبايلاس جەمقورلىققا قارسى ءىس-قيمىل اگەنتتىگى دەپارتامەنتى باسشىسىنىڭ ءبىرىنشى ورىنباسارى ءبىرجان حايرۋلليننىڭ ايتۋىنشا، ماڭعىستاۋدا سىبايلاس جەمقورلىققا قارسى مادەنيەتتى قالىپتاستىرۋ ءۇشىن 700 دەن استام اقپاراتتىق ءتۇسىندىرۋ شارالارى وتكىزىلگەن.
ءۇش مەملەكەتتىك ورگان قىزمەتىنىڭ سىبايلاس جەمقورلىق تاۋەكەلدەرىنە تالداۋ جۇرگىزىلىپ، ناتيجەسىندە ماماندار 98 ۇسىنىم ازىرلەگەن.
سونداي-اق، سىبايلاس جەمقورلىققا قارسى 13 مونيتورينگ وتكىزىلگەن. سونىڭ نەگىزىندە 49 ۇسىنىس ازىرلەنىپ، ولار مەملەكەتتىك ورگاندارعا ءساتتى ەنگىزىلگەن.
رەسپۋبليكا بويىنشا 7983 نورماتيۆتىك قۇقىقتىق اكتىنىڭ جوباسى سىبايلاس جەمقورلىققا قارسى ساراپتامادان ءوتىپ، 17170 تاۋەكەل انىقتالعان.
اياقتالعان سوتقا دەيىنگى تەرگەۋ بويىنشا وتەلگەن زالالدىڭ جالپى سوماسى — 108 ميلليارد تەڭگە.
اگەنتتىك سونداي-اق جالپى سوماسى 653 ميلليارد تەڭگەگە مۇلىكتىك اكتيۆتەر مەن اقشالاي قاراجاتتى قايتارعان.
2023-جىلعى 15- قىركۇيەكتەن باستاپ قازاقستاندا سىبايلاس جەمقورلىق فاكتىلەرى تۋرالى حابارلاعان نەمەسە سىبايلاس جەمقورلىققا قارسى ءىس-قيمىلعا جاردەمدەسكەن ادامداردى ىنتالاندىرۋ قاعيداسى كۇشىنە ەندى.
قۇجاتقا سايكەس، بوپسالاۋ فاكتىسى تۋرالى حابارلاعاندارعا بەرىلەتىن ىنتالاندىرۋ قارجىسىنىڭ كولەمى مەملەكەتكە كەلتىرىلۋى مۇمكىن بولعان زالالدىڭ جالپى سوماسىنا بايلانىستى انىقتالادى.
سىبايلاس جەمقورلىق تۋرالى اكىمشىلىك ءىس جۇرگىزىلسە، تولەم سوماسى — 30 ا ە ك. ەگەر قىلمىستىق ءىس اشىلاتىن بولسا، ىنتالاندىرۋ كولەمى - قىلمىستىڭ اۋىرلىعىنا بايلانىستى 40 تان 100 ا ە ك- كە دەيىن.
ەگەر پارانىڭ نەمەسە كەلگەن زالالدىڭ مولشەرى 1000 ا ەك- تەن اسسا، وندا ءبىرجولعى اقشالاي سىياقى - سومانىڭ %10 ىن قۇرايدى، ءبىراق 4000 ا ە ك- تەن اسپايدى.
سىبايلاس جەمقورلىق فاكتىسى تۋرالى 1424 نومىرىنە حابارلاۋعا بولادى.