قازاقستاندا جەكەشەلەندىرۋگە ارنالعان سايت ىسكە قوسىلادى

Фото: Виктор Федюнин/ Kazinform
Фото: Виктор Федюнин/ Kazinform

استانا. KAZINFORM - ەلىمىزدە جەكەگە بەرىلەتىن وبەكتىلەردىڭ ءتىزىمى جاساقتالىپ، كوپشىلىككە جاريا ەتىلەدى. بۇل تۋرالى باسەكەلەستىكتى قورعاۋ جانە دامىتۋ اگەنتتىگىنىڭ ءتوراعاسى مارات وماروۆ ءمالىم ەتتى.

ەلوردادا جەكەشەلەندىرۋ ۇلتتىق كەڭسەسىنىڭ العاشقى وتىرىسى ءوتتى. وعان ءماجىلىس دەپۋتاتتارى، مەملەكەتتىك جانە كۆازيمەملەكەتتىك ورگانداردىڭ وكىلدەرى مەن ساراپشىلار قاتىستى.

«بۇگىنگى جيىندا جەكەشەلەندىرۋدىڭ مەتودولوگياسى، تاسىلدەرى مەن مەحانيزمدەرىن قاراستىردىق. سونىمەن قاتار جۇمىس جوسپارى مەن كەستەسىن بەكىتتىك. جەكەشەلەندىرۋگە جاتاتىن وبەكتىلەرگە تالداۋ جاساپ، ولاردىڭ ءتىزىمىن جاساقتايمىز. ءبىزدىڭ ماقسات - جەكەشەلەندىرۋ پروتسەدۋراسىن تولىق اشىق وتكىزۋ، ول ءۇشىن ارنايى سايت ىسكە قوسىلادى. جەكەشەلەندىرۋگە ءبىرىنشى كەزەكتە باسەكەگە قابىلەتتى وبەكتىلەر قارالادى، ونىڭ ىشىندە الەۋمەتتىك نىساندار دا بار. تاعى ءبىر ماڭىزدى جايت، وبەكتى ساتىلعاننان كەيىن ءوز بەيىنى بويىنشا جۇمىس ىستەۋى»، - دەدى مارات وماروۆ وتىرىس بارىسىندا ب ا ق وكىلدەرىنىڭ ساۋالىنا جاۋاپ بەرە تۇرىپ.

اگەنتتىك باسشىسىنىڭ ايتۋىنشا، جەكەشەلەندىرىلگەن وبەكتىلەرگە مىندەتتى تۇردە ريەۆيزيا جۇرگىزىلەدى.

«جەكەشەلەندىرىلەتىن وبەكتىلەردىڭ الدىن الا ءتىزىمى بار، ونى شىلدەدە ناقتى جاساقتايمىز. ءتىزىم ۇلكەن، الەۋمەتتىك نىسانداردى قوسپاعاندا 500 دەن استام وبەكتى بار. جەكەشەلەندىرۋگە جاتاتىن وبەكتىلەردىڭ ءتىزىمى جاريالانادى جانە ءبىز ونى كەڭىنەن ناسيحاتتاپ، جارنامالايمىز. جەكەشەلەندىرۋ ساياساتىن جۇرگىزۋدەگى ماقسات - الدىمەن مەملەكەتتىك بيۋجەتكە سالماقتى ازايتۋ، اكتيۆتەردى ءتيىمدى پايدالانۋ جانە باسقارۋ. سونداي-اق، كاسىپكەرلىكدىڭ ەركىن دامۋىنا مۇمكىندىك جاساۋ»، - دەيدى ول.

سوڭعى جاڭالىقتار