قازاقستاندا جازاسىن وتەۋشىلەردىڭ جارتىسىنا جۋىعى جۇمىسپەن قامتىلعان
استانا. KAZINFORM - ىشكى ىستەر مينيسترلىگىنىڭ رەسمي وكىلى شىڭعىس الەكەشيەۆ ءىستى بولىپ سوتتالعان ازاماتتاردى وقىتۋ جانە ەڭبەكپەن باعىتىندا اتقارىلىپ جاتقان ءىس-شارالار تۋرالى ايتىپ بەردى.
«سوتتالعانداردى قوعامعا قايتا بەيىمدەۋ ادىستەرىنىڭ ءبىرى - جۇمىسقا ورنالاستىرۋ. كولونيالاردا سوتتالعانداردىڭ جارتىسىنا جۋىعى جۇمىسپەن قامتىلعان. جابىق مەكەمەلەردەگى ىسكە قوسىلماعان وندىرىستىك الاڭدارعا جەكە كاسىپكەرلەر تارتىلىپ جاتىر، سول نىسانداردا 4 مىڭعا جۋىق سوتتالعان جۇمىس ىستەيدى. جالپى، جابىق كولونيالاردا 11 مىڭنان استام ادام ەڭبەك ەتەدى. ولار نەگىزىنەن قۇرىلىس ماتەريالدارىن، مەتالل كونسترۋكتسيالارىن، اعاشتان جانە پلاستيكتەن جاسالعان بۇيىمداردى جاساۋمەن، سونداي- اق، نان ونىمدەرىن پىسىرۋمەن اينالىسادى»، - دەدى شىڭعىس الەكەشيەۆ ۆەدومستۆودا ونلاين وتكەن بريفينگىدە.
ونىڭ ايتۋىنشا، جازاسىن وتەپ جاتقانداردى جۇمىسپەن قامتۋ وزدەرى كەلتىرگەن مۇلىكتىك زالالدى وتەۋگە، اليمەنت تولەۋگە نەمەسە تۋىستارىنا قارجىلىق تۇرعىدان كومەكتەسۋىنە مۇمكىندىك بەرەدى.
«سوتتالعانداردى وقىتۋ دا ەرەكشە نازاردا. بۇگىندە 44 مەكەمەدە سۇرانىسقا يە 35 ماماندىق بويىنشا كاسىپتىك دايارلاۋ جۇرگىزىلەدى. اتاپ ايتقاندا، اعاش ۇستالارى، سۋرەتشىلەر، سىلاقشىلار، تىگىنشىلەر، ناۋبايشىلار جانە باسقا كاسىپ يەلەرى بار. وسى باعىت بويىنشا شامامەن 3 مىڭ ادام ءبىلىم الىپ جاتىر»، - دەيدى ول.
ايتا كەتەيىك، بۇگىندە ەلىمىزدە 37 مىڭ ادام جازاسىن وتەپ جاتىر.
