قازاقستاندا جالاقى نەگە از؟ مينيستر ءتۇسىندىردى

استانا. قازاقپارات – قارجى ءمينيسترى ءمادي تاكيەۆ پەن ۇلتتىق ەكونوميكا ءمينيسترى نۇرلان بايبازاروۆ قازاقستاندا جالاقى نەگە از ەكەنىن ءتۇسىندىردى.

مينيستر بۇگىنگى تاڭدا 100-150 مىڭ ارالىعىنداعى جالاقىنى قازاقستاندىقتاردىڭ 35 پايىزى الاتىنىن ايتتى.

«300-600 مىڭ ارالىعىندا 36 پايىزى الادى. بۇگىنگى تاڭدا ەكونوميكانىڭ كورىنىسى سونداي. جالپى كوپ كومەك بەرىلىپ جاتىر. 2-3 جىلدىڭ ىشىندە مۇعالىمدەر، دارىگەرلەردىڭ جالاقىسى كوتەرىلدى. ءالى دە كوبەيەدى دەپ سەنەمىز. ودان باسقا ەڭ تومەنگى جالاقى 85 مىڭ تەڭگە»، - دەيدى تاكيەۆ.

ال ۇلتتىق ەكونوميكا ءمينيسترى نۇرلان بايبازاروۆ ەكونوميكالىق سەكتورداعى جالاقى ءوندىرىستىڭ ونىمدىلىگىنە بايلانىستى ەكەنىن ايتادى.

«جالاقى ءبىر ورىندا تۇرعان جوق. كاسىپورىندار تابىسى ارتقان سايىن، قىزمەتكەرلەردىڭ جالاقىسىن كوتەرۋگە تىرىسادى. ەكىنشى جاعىنان مەملەكەتتىك قولداۋ شارالارى كەزىندە قويىلاتىن تالاپ - قىزمەتكەرلەرىنىڭ جالاقىسىن كوتەرىپ قويۋى قاجەت. ەگەر بيۋجەت سالاسى جايلى ايتار بولساق، وزدەرىڭىزگە بەلگىلى، كەيىنگى جىلدارى بيۋجەت ەسەبىنەن مەملەكەتتىك، ازاماتتىق قىزمەتكەرلەرگە جالاقىنى كوتەرۋ جۇمىستارى جۇرگىزىلدى. ءالى دە جۇرگىزىلىپ جاتىر. سوندىقتان بيۋجەتتىڭ مۇمكىندىگىنشە حالىقتىڭ ءال-اۋقاتىن كوتەرۋ ءۇشىن جۇمىستى جالعاستىرامىز»، - دەيدى بايبازاروۆ.

ەسكە سالايىق، 14-قازاندا ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ازاماتتار جۇمىستان قاشقان نەمەسە باس تارتقان جاعدايدا ماسەلەنى زاڭمەن رەتتەۋ كەرەك دەگەن ۇسىنىس بىلدىرگەن بولاتىن.

مينيستر سۆەتلانا جاقىپوۆا بيۋدجەتتەن ەشكىمگە تەگىن اقشا بەرىلىپ جاتپاعانىن جەتكىزدى.

«بىرىنشىدەن، الەۋمەتتىك تولەم الەۋمەتتىك ساقتاندىرۋ قورىنان تولەنەدى. ازامات جۇمىس ىستەپ، كەيىن جۇمىسىن جوعالتىپ، جۇمىسسىز 6 اي وتىرعان كەزدە عانا بەرىلەدى. باسقا ازاماتتارعا وتەماقى تولەنبەيدى. رەسپۋبليكالىق بيۋدجەتتەن ونداي تولەمدەر جوق. تەگىن اقشا بەرىپ وتىرعان جوقپىز»، - دەدى ول.

سونىمەن قاتار ۆەدومستۆو باسشىسى كەيبىر ازاماتتار جوعارى جالاقى ۇسىناتىن جۇمىستارعا دا بارعىسى كەلمەيتىنىن ايتتى.

مينيستر جۇمىستان قاشاتىندارعا، باس تارتاتىندارعا قاتىستى ماسەلەنى زاڭمەن رەتتەۋ كەرەك دەگەن پىكىر ءبىلدىردى.