قازاقستاندا جاڭا موبيلدى وپەراتور پايدا بولۋى مۇمكىن

استانا. KAZINFORM - ەلدەگى بايلانىس وپەراتورلارىنىڭ قىزمەت ساپاسى مەن تاريف دەڭگەيى تۇرعىنداردىڭ كوڭىلىنەن شىقپاسا، جاڭا موبيلدى وپەراتور ىسكە قوسىلۋى مۇمكىن. بۇل تۋرالى سيفرلىق دامۋ، يننوۆاتسيالار جانە اەروعارىش ونەركاسىبى ۆيتسە-ءمينيسترى اسحات ورازبەك ۇكىمەتتەگى بريفينگتە مالىمدەدى.

мобильді аударым
Фото: ҚР Қаржы министрлігі

ونىڭ ايتۋىنشا، مينيسترلىك Tele2 مەن Altel كومپانيالارىن قاتار ينۆەستورىنا ساتۋ مامىلەسىنە ۇلكەن ءۇمىت ارتىپ وتىر، سەبەبى بۇل بايلانىس وپەراتورلارى اراسىنداعى باسەكەنى كۇشەيتەدى.

- بىزدە ءبىراز ۋاقىت بويى موبيلدى بايلانىس نارىعىندا دۋوپوليا بولدى. وليگوپوليا سياقتى دۋوپوليا دا اسا ءتيىمدى ەمەس. سوندىقتان تاريفتەردى رەتتەي المايتىنىمىز ءۇشىن بۇل مامىلەدەن ۇلكەن ءۇمىت كۇتەمىز. ياعني ءۇش تاۋەلسىز موبيلدى بايلانىس وپەراتورلارىنىڭ اراسىنداعى باسەكەگە سەنىم ارتامىز. بۇل بايلانىس ساپاسىن جاقسارتۋعا مۇمكىندىك بەرەدى دەپ ويلايمىز جانە بۇنىڭ باعالارعا اسەر ەتەتىنىنە سەنىمدىمىز. ەستەرىڭىزدە بولسا، Tele2 نارىققا كەلگەندە تاريفتەردى كۇرت تومەندەتكەن ەدى، بۇل Kcell مەن Beeline كومپانيالارىن دا باعالارىن تومەندەتۋگە ءماجبۇر ەتتى، - دەدى ۆيتسە-مينيستر.

ونىڭ ايتۋىنشا، الداعى جارتى جىلدا جاڭا كوماندا كومپانياداعى جاعدايدى زەرتتەپ، نارىقتى جاقسارتۋ ءۇشىن شارالار قابىلدايدى. ەگەر بۇل جۇزەگە اسپاسا، تسيفرلىق دامۋ مينيسترلىگى 2 جىلدا جاڭا وپەراتوردى ەنگىزۋدى جوسپارلاپ وتىر، بۇل ءۇشىن جيىلىك دياپازوندارى دايىندالعان.

- ەكى جىلدان كەيىن، ەگەر قازىرگى ءۇش وپەراتور ازاماتتارىمىزدىڭ ساپا مەن تاريفتەرگە قاتىستى قاجەتتىلىكتەرىن قاناعاتتاندىرماسا، ءبىز نارىققا ءتورتىنشى وپەراتوردى ەنگىزۋگە دايىن بولامىز، - دەپ تولىقتىردى اسحات ورازبەك.

ايتا كەتەيىك، قازاقستاندا تەلەكوممۋنيكاتسيالار تۋرالى جاڭا زاڭ ازىرلەنىپ جاتىر.

سونداي-اق، ەلىمىزدە بايلانىس ساپاسىن قاداعالاپ، ازاماتتاردىڭ قۇقىقتارىن قورعايتىن قور قۇرىلادى.

سوڭعى جاڭالىقتار