قازاقستاندا جاڭا جىلدىق مەرەكەلەردە قالاي اقشا تابۋعا بولادى؟

جاڭا جىلدا تەك دەمالىپ قويماي، قوسىمشا تابىس تابۋعا دا بولادى. جاڭا جىلدا قانداي قىزمەت ءوتىمدى؟

انيماتور بولۋ

قازاقستاندىقتار جاڭا جىلدا بالالارعا كوپ كوڭىل بولەدى. جاڭا جىلدىق شىرشانى اينالىپ، اياز-اتا مەن اقشاقاردان سىيلىق الىپ، وتشاشۋ اتۋ بالالاردىڭ جىل سايىنعى ارمانى. ءتىپتى كەيبىر اتا-انالار ەرتەگى كەيىپكەرلەرىن ۇيلەرىنە شاقىرىپ جاتادى. بۇل كەزدە انيماتور بولىپ اقشا تابۋ ەڭ ءتيىمدى جول. الايدا بۇل سالادا باسەكەلەستىك وتە جوعارى. سوندىقتان بۇل بيزنەستى جۇزەگە اسىرۋ ءۇشىن الدىن الا دايىندالۋ كەرەك. ادەمى كوستيۋمدەر ساتىپ الىپ، ساپالى فوتو، ۆيدەو ءتۇسىرىپ جارناماسىن جاڭعىرتىڭىز. بەلسەندىلىك تانىتىپ ءارتۇرلى كومپانيالارعا ءوز قىزمەتىڭىزدى ۇسىنىڭىز.

تاكسي جۇرگىزۋشىسى بولۋ نەمەسە جالدامالى جۇرگىزۋشى

بۇل مەرەكەدە ادامداردىڭ بارىس-كەلىسى كوبەيەدى. ءتۇرلى كورپوراتيۆتەر، الىس-جاقىن اعايىننىڭ ءبىر ۇيدە جينالۋى، وتباسىمەن ورتالىق شىرشاعا بارىپ سۋرەتكە ءتۇسۋ سەكىلدى قىدىرىستار كوبەيەدى. ال بۇل ادامداردىڭ بارىنە تاكسي كەرەك. سونداي-اق كوپتەگەن ادامدار مەرەكە كۇندەرى رولگە وتىرۋدان باس تارتادى. ولارعا كورپاراتيۆتەن، ءىس-شارالاردان شىققاندا جالدامالى جۇرگىزۋشىلەر كەرەك. قازىرگى ۋاقىتتا تاكسي جۇرگىزۋشىلەرى مەن جالدامالى جۇرگىزۋشىلەردىڭ قىزمەتىنە سۇرانىس ەداۋىر ارتىپ كەلەدى. دەمەك جاڭا جىلدى رولدە قارسى الۋعا دايىن كاسىپكەر ازاماتتارعا جاقسى اقشا تابۋعا زور مۇمكىندىك. ويتكەنى مۇنداي كۇندەرى تاسىمالداۋشىلاردىڭ قىزمەتتەرىنە تاريفتەر ايتارلىقتاي جوعارىلايدى.

جەتكىزۋ قىزمەتى (كۋرەر)

ادامدار جەتكىزۋ قىزمەتىندە جىل بويىن جۇمىس ىستەي الادى. ويتكەنى ءقازىر بارلىعى تاپسىرىس بەرۋگە داعدىلانعان. ال مەرەكە كۇندەرى بۇل جۇمىس قايناي تۇسەدى. الايدا بۇل قىزمەتتىڭ ءوز كەمشىلىكتەرى دە جوق ەمەس. اۋا-رايىنىڭ قولايسىز ۋاقىتتارىندا جۇمىس ىستەۋگە تۋرا كەلەدى. وعان قوسا قالانىڭ ءىشىن جاقسى ءبىلۋ ماڭىزدى.

تاپسىرىس جيناۋشى

بۇل قىزمەت جەتكىزۋ قارقىنىنىڭ ارقاسىندا سۇرانىسقا يە بولدى. تاپسىرمالار: دۇكەندەگى نەمەسە قويماداعى تاپسىرىستاردى جيناقتاۋ، تاۋارلاردى تەكسەرۋ (مىسالى، جارامدىلىق مەرزىمى) جانە ولاردى تۇتىنۋشىلارعا نەمەسە كۋرەرلەرگە بەرۋ. الايدا بۇل جۇمىس فيزيكالىق بەلسەندىلىكتى تالاپ ەتەدى.

ساتۋشى، كاسسير

جوعارى سۇرانىس كەزەڭىندە، مىسالى جارمەڭكەلەردە جاڭا ساۋدا نۇكتەلەرى پايدا بولادى. دۇكەندەردە بارلىق ساتىپ الۋشىلارعا قىزمەت كورسەتۋ ءۇشىن قوسىمشا كاسسالار اشىلادى. ساتۋشىنىڭ مىندەتتەرىنە كاسسادا جانە ساۋدا الاڭىندا جۇمىس ىستەۋ، تاۋارلاردى ورنالاستىرۋ جانە باعا بەلگىلەرىن وزگەرتۋ كىرەدى. سونداي-اق، جارامدىلىق مەرزىمىن قاداعالاپ، ساتىپ الۋشىلارمەن بايلانىسىپ، جۇمىس ورنىندا ءتارتىپتى ساقتاۋ قاجەت.

داياشى

جەلتوقسان ايىندا جانە قاڭتاردىڭ مەرەكەلىك اپتاسىندا تاماقتانۋ ورىندارىندا انشلاگ بولادى. ولار مەرەكە كۇندەرگە الدىن-الا دايىندالادى. بارلىق شتاتتىق قىزمەتكەرلەردى جۇمىسقا تارتادى. ءتىپتى قوسىمشا قىزمەتكەرلەر الۋى دا ىقتيمال. داياشىلىق قىزمەت ادامدارمەن ءجيى ارالاسۋدى ۇناتاتىن جاندارعا ارنالعان. تاپسىرىستاردى قابىلداۋ، ۋاقىتىلى جەتكىزۋ، ەسەپشوتتى كەشىكتىرمەي اكەلۋ تاپسىرمالارىن مۇدىرمەي ورىنداۋ قاجەت.

massaget.kz