قازاقستاندا جاڭا جىلدىق داستارحان جايۋ ءۇشىن قانشا تەڭگە كەرەك

استانا. KAZINFORM - وليۆە، مانتى، ماندارين جانە اققاينار. جاڭا جىلعا ارنالعان داستارحان ۇستىندە وسى تاعامدار تۇرادى. ەلىمىزدە مەرەكەلىك داستارحان جايۋعا قانشا تەڭگە جۇمسالادى؟ بۇل تۋرالى Kazinform اگەنتتىگىنىڭ ءتىلشىسى سارالاپ كوردى.

جاڭا جىلعا دەيىن بىرەر كۇن قالدى. قازاقستاندىقتار قازىر مەرەكەلىك داستارحانعا قوياتىن اس ءمازىرىن ازىرلەپ، وعان قاجەتتى تاعامداردى ساتىپ الىپ جاتىر. ءبىز وتباسىنداعى ءتورت جانعا داستارحان جايۋ قۇنى قانشا تۇراتىنىن سارالاپ كوردىك. ارينە، ءار وتباسىنىڭ اس ءمازىرى ءارتۇرلى. سۇيىكتى تاعامدارى دا تالعامعا قاراي وزگەشە دايىندالادى. سوعان قاراماستان ءبىز قاراپايىم عانا داستارحان ءمازىرىن الدىق. وعان ەكى سالات، مانتى، جەمىس- جيدەك پەن تورت جانە شىرىندى قوسىپ، شىعىنىن ەسەپتەدىك.

جاڭا جىل تۇنىندە داستارحاندا وليۆە نەمەسە بالىق قوسىلعان سالات بولادى. ال جاڭا جىل مەرەكەسىنە ارنالعان داستارحاننىڭ ءسانى - ماندارين. سونىمەن بىرگە قازاقستاندىقتار اناناستى دا سول تۇنگى داستارحانعا قويادى. اققاينار دا داستارحاننان تابىلادى. داستارحان باسىنا جينالعاندار ءبىر-بىرىنە تىلەك ايتىپ، شاراپ ىشسە، بالالارعا شىرىن نەمەسە گازدالعان ءتۇرلى ءتاتتى سۋسىن بەرەدى. ەندى ءتورت ادامعا ارنالعان داستارحان ءمازىرىن ەسەپتەپ كورەيىك.

باستى ىستىق تاماق - مانتى. ءار وتباسى ونى ءارتۇرلى دايىندايدى. ەت ىشىنە پياز، كارتوپ نەمەسە اسقاباق قوسادى. تارتىلعان سيىر ەتىنىڭ كەلىسى شامامەن 3000 تەڭگە تۇرادى. ۇن 600، پياز 200، كارتوپ 150 تەڭگە. ال اسقاباقتىڭ كەلىسى 700-800 تەڭگە. قاجەتتى قارجى - 4750 تەڭگە.

ينفوگرافيكا: Kazinform

سالات ازىرلەۋگە نە قاجەت؟ ەكى ىدىسقا «وليۆە» دايىنداۋ ءۇشىن 200 گرام پىسكەن كارتوپ (60 ت گ)، 4 جۇمىرتقا (240 ت گ)، 200 گرام شۇجىق نەمەسە پىسكەن ەت (400 ت گ)، 200 گرام تۇزدالعان قيار (150 ت گ)، 200 گرام پىسكەن ءسابىز (50 ت گ)، 100 گرام پياز (40 ت گ)، 400 گرام مايونەز (450 ت گ)، 1 بانكا بۇرشاق (550 ت گ)، تۇز جانە بۇرىش (50 ت گ). شىعىنى - 1990 تەڭگە.

«بالىق قوسىلعان سالات»: 400 گرام تۇزدالعان بالىق (900 ت گ)، 300 گرام پىسكەن كارتوپ (60 ت گ)، 300 گرام پىسكەن ءسابىز (80 ت گ)، 100 گرام پياز (40 ت گ)، 6 دانا جۇمىرتقا (450 ت گ)، 300 گرام پىسكەن قىزىلشا (200 ت گ)، 400 گرام مايونەز (450 ت گ). شىعىنى - 2180 ت گ.

شاي داستارحانىنا تورت الادى. دەسەرتتىڭ بۇل ءتۇرى شامامەن 7000 تەڭگە تۇرادى. ال جەمىستەن ماندارين (1400 ت گ)، الما (500 ت گ)، اناناس (2000 ت گ) الادى. سۋسىنان اققاينار (2000-7000 ت گ) ، سالقىنداتىلعان شىرىندى (500-1000 ت گ) داستارحانعا قويادى.

ناتيجەسىندە جاڭا جىلعا ارناپ داستارحان جايۋ قۇنى 24000 تەڭگەدەن اسادى. داستارحانعا قاجەتتى تاعام مەن سالاتقا قوساتىن كوكونىس پەن وزگە قوسپالاردىڭ ورتاشا باعاسى الىندى. ايماقتار اراسىندا تاراز بەن تۇركىستاندا داستارحان مازىرىنە از اقشا جۇمساۋعا بولادى. ال قىمباتى - استانا، الماتى جانە اتىراۋدا.

اۆتور

التىناي ساعىندىقوۆا