قازاقستاندا «شاكەن جۇلدىزدارى» كينوفەستيۆالى قايتا جاندانادى

الماتى. KAZINFORM - الماتىدا ءوتىپ جاتقان «ەۋرازيا» حالىقارالىق كينوفەستيۆالىنىڭ اشىلۋىندا مادەنيەت جانە اقپارات ءمينيسترى ايدا بالايەۆا قازاقستاندىق كينويندۋستريا قالاي داميتىنى تۋرالى ايتتى.

ايدا بالايەۆا قازىر وتاندىق كينويندۋستريا تۇبەگەيلى وزگەرىستەرگە ۇشىراپ جاتقانىن ايتتى. ءبىرىنشى كەزەكتە مەملەكەت پەن كينووندىرۋشىلەر اراسىنداعى ءوزارا ءىس- قيمىل تەتىكتەرى، ونىڭ ىشىندە قارجىلاندىرۋ ماسەلەلەرى جەتىلدىرىلىپ جاتىر.

«ارينە، قيىندىقتار بار، ءبىراق ءبىز كينويندۋستريانى ماقساتتى تۇردە دامىتۋدى، زاڭنامالىق بازانى جەتىلدىرۋدى، قارجىلاندىرۋ جانە كونتەنت ءوندىرۋ پروتسەستەرىن بارىنشا اشىق ەتۋدى جالعاستىرامىز. بۇدان بولەك، دارىندى رەجيسسەرلەرگە جاڭا مۇمكىندىكتەردى اشۋعا كومەكتەسۋدى، كينووندىرىستىڭ ۇزدىك جوبالارىن جانداندىرۋدى جانە قولداۋدى توقتاتپايمىز. سوندىقتان دا بۇل كينوفەستيۆال ءوتتى (ەۋرازيا - اۆتور ەسكەرتپەسى). ءدال وسى سەبەپتى ءبىز بولاشاقتا اتى اڭىزعا اينالعان «شاكەن جۇلدىزدارى» كينوفەستيۆالىن قايتا جاڭعىرتۋعا بار كۇش- جىگەرىمىزدى سالامىز»، - دەدى ول.

مينيستر شاكەن ايمانوۆ اتىنداعى كينوستۋدياداعى نەگىزگى وزگەرىستەر قازاقستاننىڭ كينويندۋسترياسى ءۇشىن ماڭىزدى بولاتىنىن اتاپ ءوتتى.

«ءبىرقاتار زاڭنامالىق باستامانىڭ ارقاسىندا كينوستۋديا ءوز دامۋىنىڭ جاڭا داۋىرىنە قادام باسىپ جاتىر. كەلەسى جىلدان باستاپ مادەنيەت جانە اقپارات مينيسترلىگى كينوستۋديانى تىكەلەي قارجىلاندىرۋعا زاڭدى قۇقىنا يە بولادى. زاڭ جوباسى وسى جىلدىڭ سوڭىنا دەيىن پرەزيدەنتتىڭ قول قويۋىنا جىبەرىلەدى. ەگەر قابىلدانسا، ەلىمىزدەگى فيلمدەرگە بولىنەتىن جالپى قارجىنىڭ كەم دەگەندە 30 پايىزى تىكەلەي «قازاقفيلمگە» باعىتتالادى. بۇل كوپتەگەن وزەكتى ماسەلەنى شەشەدى، كينوستۋديا مۇراسىن ساقتايدى، ونىڭ قارجىلىق جاعدايىن تۇراقتى ەتەدى جانە جۇمىسىن ءتيىمدى ەتپەك»، - دەپ قوستى ول.

بۇعان دەيىن ايدا بالايەۆا قازاق فيلمنىڭ بولاشاعى تۋرالى ايتقان بولاتىن.

ەسكە سالايىق، الماتىدا «ەۋرازيا» حالىقارالىق كينوفەستيۆالى سالتاناتتى تۇردە اشىلدى.
حالىقارالىق «ەۋرازيا» كينوفەستيۆالى 24-30-قاراشا ارالىعىندا وتەدى. فەستيۆالگە 15تەن استام ەل قاتىسىپ جاتىر.

اۋقىمدى شارانى ق ر مادەنيەت جانە اقپارات مينيسترلىگى مەن شاكەن ايمانوۆ اتىنداعى «قازاقفيلم» ۇلتتىق كينوستۋدياسى ۇيىمداستىرعان.

ايتا كەتەيىك، بيىل كونكۋرس باعدارلاماسىندا ءۇش قۇرلىقتان كەلگەن 12 فيلم ۇسىنىلادى.

كونكۋرس بانگلادەش پەن وڭتۇستىك كورەيادان باستاپ، اۆستريا مەن كاتارعا دەيىنگى ەلدەردىڭ تۋىندىلارىن قامتيدى. ەۋروپا، ازيا جانە تاياۋ شىعىستان كەلگەن شىعارماشىلىق توپتار امبەباپ تاقىرىپتار مەن جەرگىلىكتى كونتەكستتى بىرىكتىرەتىن جۇمىستاردى ۇسىنباق.