قازاقستاندا ءجۇز ادامعا دونورلىق جۇرەك اۋىستىرىلدى - مينيستر
استانا. KAZINFORM - العاش ەلىمىزدە جۇرەك ترانسپلانتاتسياسى 2012-جىلى 38 جاستاعى پاتسيەنتكە جاسالدى. بۇگىندە ءجۇز ادامنىڭ جۇرەگى اۋىستىرىلدى.
- بۇگىن قازاقستان مەديتسيناسى ءۇشىن ەڭ ماڭىزدى كۇن. تاۋەلسىزدىك العالى مەديتسينا سالاسىنىڭ ەڭ بيىك شىڭى ترانسپلانتاتسيا دەڭگەيى دەپ ايتۋعا بولادى. سوندىقتان ەلىمىزدە ءجۇزىنشى ترانسپلانتاتسياسى جاسالعانى شىن مانىندە تاريحي ءسات. بۇگىن ءىس-شارانىڭ ماقساتى - ەلىمىزدىڭ مەديتسينا سالاسىنداعى وسى جەتىستىگىن ايتۋ، بۇل جولدا بىرنەشە جىل بويى مەديتسينا سالاسىنىڭ ماماندارى ەڭبەك ەتتى. ەڭ العاش ەلىمىزدە جۇرەك ترانسپلانتاتسياسى 2012-جىلى 38 جاستاعى پاتسيەنتكە جاسالدى. جاڭا جۇرەك ادامدارعا جاڭا ءومىر بەردى، بۇل وتاندىق مەديتسينانىڭ جەتكەن جەتىستىگى. ادامي كاپيتالدىڭ دامۋىنا، ونىڭ ىشىندە مەديتسينا سالاسى پرەزيدەنتتىڭ ءجىتى نازارىندا، - دەدى دەنساۋلىق ساقتاۋ ءمينيسترى اقمارال ءالنازاروۆا ەلوردادا «جۇرەكتىڭ جاڭا سوعىسى» دەگەن ۇرانمەن وتكەن «قازاقستانداعى 100-جۇرەك ترانسپلانتاتسياسى» فورۋمىندا.
ءمينيستردىڭ مالىمدەۋىنشە، سوڭعى جىلدارى مەديتسينا سالاسىنا بولىنەتىن قارجى كولەمى بىرنەشە ەسە ارتتى.
- ەلىمىزدە جاسالىپ جاتقان وتالاردى ورتالىق ازيا جانە تمد ەلدەرى اراسىندا جەتەكشى ورىندا دەپ ايتۋعا بولادى، - دەيدى ۆەدومستۆو باسشىسى.
ايتا كەتسەك، بۇگىن ەلوردادا «قازاقستانداعى 100-جۇرەك ترانسپلانتاتسياسى» فورۋمى ءوتتى. اتالعان ءىس-شارا ەلىمىزدە ءجۇزىنشى رەت جۇرەك اۋىستىرۋ وتاسىنا وراي ۇيىمداستىرىلدى، وعان دەنساۋلىق ساقتاۋ ءمينيسترى اقمارال ءالنازاروۆا باستاعان سالا ماماندارى مەن وڭىرلىك ۆەدومستۆولاردىڭ وكىلدەرى قاتىستى.
فورۋم سوڭىندا اعزا ترانسپلانتاتسياسى سالاسىنا ەڭبەگى سىڭگەن جانە ەرەكشە كوزگە تۇسكەن جاندار ماراپاتتالدى.
اتالعان ءىس-شارادا ەلىمىزگە بەلگىلى دارىگەر يۋريي پيا ترانسپلانتاتسيا تەك مەديتسينا ماسەلەسى ەمەس، قوعامنىڭ ورتاق پروبلەماسى ەكەنىن ءمالىم ەتتى.
ەسكە سالا كەتەيىك، بىلتىر ەلىمىزدە ترانسپلانتاتسيا جاسالاتىن ورگان ارنايى قۇرىلعىدا ساقتالاتىنى تۋرالى جازعان ەدىك.
قازىر اتالعان اپپارات سىناقتان ءوتىپ جاتىر، بيىل ساۋىردەن كەيىن پايدالانۋعا بەرىلۋى مۇمكىن.
