قازاقستاندا ءدارى-دارمەكتى 100 كۇننەن اسپايتىن مەرزىمدە تىركەيتىن جوبا ىسكە قوسىلدى
استانا. KAZINFORM - قازاقستاندا دارىلىك زاتتار مەن مەديتسينالىق بۇيىمداردى «ءبىر تەرەزە» قاعيداتى بويىنشا 100 جۇمىس كۇنىنەن اسپايتىن مەرزىمدە تىركەۋ جونىندەگى پيلوتتىق جوبا ىسكە قوسىلدى.
بۇل جوبا مەملەكەتتىك قىزمەتتەردى رەينجينيرينگتەۋ جانە دەنساۋلىق ساقتاۋ سالاسىن سيفرلاندىرۋ باستامالارى شەڭبەرىندە، سيفرلىق دامۋ مينيسترلىگى مەن دەنساۋلىق ساقتاۋ مينيسترلىگىنىڭ ءوزارا ءىس-قيمىلى ارقىلى جۇزەگە اسىرىلىپ وتىر.
جاڭا ءتاسىل ونىمدەردىڭ نارىققا شىعۋ مەرزىمىن ەداۋىر قىسقارتىپ، قايتالاناتىن اكىمشىلىك راسىمدەردى جويۋعا مۇمكىندىك بەرەدى. قازىرگى تاڭدا ءدارى-دارمەكتەرگە ساراپتاما جۇرگىزۋ 210 كۇنگە دەيىن، باعا قالىپتاستىرۋ - 60 جۇمىس كۇنىنە دەيىن، ال كاسىبي ساراپتاما - 50 جۇمىس كۇنىنە دەيىن سوزىلۋى مۇمكىن، كومپوزيتتىك مەملەكەتتىك قىزمەتتى قولدانۋ ارقىلى بۇل پروتسەستەر بىرىكتىرىلىپ، پاراللەل تۇردە 100 جۇمىس كۇنىنەن اسپاي وتەتىن بولادى.
كومپوزيتتىك مەملەكەتتىك قىزمەت ەرىكتى ءارى بالامالى نەگىزدە ەنگىزىلەدى جانە قولدانىستاعى ساراپتاما، تىركەۋ جانە باعا بەلگىلەۋ مەحانيزمدەرىمەن قاتار قولدانىلادى، سونىمەن قاتار، بۇل قىزمەت دارىلىك زاتتاردى قازاقستاننىڭ ۇلتتىق دارىلىك فورمۋليارىنا ەنگىزۋ ءۇشىن كاسىبي ساراپتامادان وتكىزۋدى دە قاراستىرادى.
سونداي-اق كومپوزيتتىك مەملەكەتتىك قىزمەت دۇنيەجۇزىلىك دەنساۋلىق ساقتاۋ ۇيىمىمەن بىرلەسكەن تىركەۋ ءراسىمىن جۇرگىزۋدى كوزدەگەن. بۇل - دارىلىك پرەپاراتتاردى الدىن الا بىلىكتەندىرۋ جانە ا ق ش، ەۋروپالىق وداق، ۇلى بريتانيا، جاپونيا سياقتى قاتاڭ رەتتەۋ جۇيەسى بار ەلدەردىڭ رەتتەۋشى ورگاندارى تاراپىنان تانۋ ءتارتىبى شەڭبەرىندە جۇزەگە اسادى جانە 15 جۇمىس كۇنىنەن اسپايدى.
وسىنداي جەدەلدەتىلگەن مەرزىمدەر تانىلعان رەتتەۋشى جۇيەلەرى بار ەلدەردە وندىرىلگەن مەديتسينالىق بۇيىمدارعا دا قولدانىلاتىن بولادى.
سونىمەن قاتار، كومپوزيتتىك قىزمەتتىڭ شەڭبەرىندە ءوندىرۋشى باعاسىن تىركەۋ، كوتەرمە جانە بولشەك ساۋدادا ساتىلعان كەزدەگى ۇستەمە باعالاردى اۆتوماتتى تۇردە ەسەپتەۋ كوزدەلگەن، بۇل – ت م ك ك ك جانە م ءا م س شەڭبەرىندە ىسكە اسىرىلادى.
پيلوتتىق جوبا بيىلعى 1-شىلدەگە دەيىن جالعاسادى. ەگەر ونىڭ تيىمدىلىگى راستالسا، كومپوزيتتىك قىزمەت كورسەتۋدىڭ تۇراقتى مودەلىنە كوشۋ جانە قولدانىستاعى نورماتيۆتىك تالاپتاردى جويۋ جوسپارلانۋدا. بۇل - دارىلىك زاتتاردىڭ نارىققا جىلدام شىعۋىن قامتاماسىز ەتەتىن ماڭىزدى قادام بولماق.
ايتا كەتەيىك، ە ا ە و ءدارى-دارمەكتەردى ۇلتتىق قاعيدالار بويىنشا تىركەۋدى 2027-جىلدىڭ سوڭىنا دەيىن ۇزارتتى.
