قازاقستاندا عالىمدار مەن كاسىپكەرلەر سۋپەركومپيۋتەردى جالعا الا الادى
استانا. KAZINFORM - پرەمەر-مينيستر ولجاس بەكتەنوۆ اقپاراتتىق- كوممۋنيكاتسيالىق ينفراقۇرىلىم وبەكتىلەرىن جالعا الۋ راسىمدەرىن وڭايلاتۋدى تاپسىردى.
ايتا كەتەيىك، 2024 -جىلدىڭ سوڭىنا دەيىن «سامۇرىق- قازىنا» ۇلتتىق ءال-اۋقات قورى جانە Group42 كومپانياسىمەن بىرلەسىپ نەعۇرلىم زاماناۋي تەحنولوگيالاردى پايدالانا وتىرىپ، سۋپەركومپيۋتەر ىسكە قوسىلادى.
سۋپەركومپيۋتەر جاساندى ينتەللەكت مودەلدەرىن قۇرۋعا قىزمەت ەتەدى جانە عىلىمي، اكادەميالىق ورتاعا، سونداي-اق جاساندى ينتەللەكت ونىمدەرىن جاساۋدا كوممەرتسيالىق ماقساتتا قولجەتىمدى بولادى.
«سۋپەركومپيۋتەردىڭ ەسەپتەۋ قۋاتىن پايدالانۋ ونى بيزنەس پەن عىلىمي قوعامداستىققا جالعا بەرۋ ارقىلى ەكونوميكا سەكتورلارىندا ونىمدىلىكتى ارتتىرۋعا مۇمكىندىك بەرەدى. سۋپەركومپيۋتەر جوباسىن باستاۋ ءۇشىن جاساندى ينتەللەكت قۇرالدارىنىڭ قۇقىقتىلىعى بويىنشا شۇعىل شارالار قابىلداۋ قاجەت»، - دەدى و. بەكتەنوۆ ۇكىمەت وتىرىسىندا.
ۇكىمەت باسشىسى اقپاراتتىق-كوممۋنيكاتسيالىق ينفراقۇرىلىم وبەكتىلەرىن جالعا الۋ راسىمدەرىن وڭايلاتۋ، سونداي-اق قازاقستاندىق ءتىل مودەلىن (KazLLM) ازىرلەۋدى جەدەلدەتۋ ماڭىزدى ەكەنىن جەتكىزدى.
«وسىعان بايلانىستى قارجى مينيسترلىگىنە بيىلعى شىلدەنىڭ سوڭىنا دەيىن قولدانىستاعى تارتىپكە قاجەتتى تۇزەتۋلەردى پىسىقتاۋدى تاپسىرامىن. عىلىم مينيسترلىگى نازاربايەۆ ۋنيۆەرسيتەتىمەن بىرلەسىپ، جىل سوڭىنا دەيىن KazLLM ۇلكەن تىلدىك مودەلىنە ارنالعان دەرەكتەر جيناۋدى اياقتاسىن. ساياسات نۇربەك ۇلى (عىلىم جانە جوعارى ءبىلىم ءمينيسترى - رەد.)، ءبىرىنشى مودەلدى سىناقتان وتكىزۋ بيىل 3-توقساندا جۇرگىزىلۋگە ءتيىس»، - دەدى و. بەكتەنوۆ.
