قازاقستاندا بيزنەس كرەديتكە كەپىلدىك بەرەتىن قور جۇمىسىن باستادى
استانا. KAZINFORM - بۇگىن «دامۋ» قورى جاڭا «كەپىلدىك قورى» اياسىندا العاش كەپىلدىگىن بەردى. بۇل تۋرالى ۇلتتىق ەكونوميكا مينيسترلىگى حابارلايدى.
«دامۋ» قورى بازاسىندا شاعىن جانە ورتا بيزنەس پەن ءىرى بيزنەستىڭ جوبالارىن نەسيەلەۋ ءۇشىن «كەپىلدىك قورىن» ىسكە قوستى. ونى جامبىل وبلىسىندا «Asatu» برەندىمەن ماكارون ونىمدەرىن شىعاراتىن ولەگ پانكەيەۆ پايدالاندى. قاراجاتتى كاسىپكەر جابدىق ساتىپ الۋ جانە ءوندىرىس-قويما عيماراتىن سالۋعا جۇمساماق.
- قوردىڭ جاڭا كەپىلدىگىنىڭ ارقاسىندا ءبىز جاڭا سەح سالۋ ءۇشىن ءتيىمدى شارتتارمەن قارجى الا الدىق. بۇل ءبىزدىڭ بيزنەس ءۇشىن ماڭىزدى قولداۋ جانە قاراجات الۋ پروتسەسى الدەقايدا جەڭىل جانە جىلدام ءوتتى. سونىمەن قاتار بۇل جوبا جۇمىس ورىندارىن اشۋعا تۇرتكى بولىپ، ءوڭىر ەكونوميكاسى دامۋىنا ىقپال ەتەدى، - دەيدى كاسىپكەر ولەگ پانكەيەۆ.
ءدال قازىر ەكىنشى دەڭگەيلى بانكتەرمەن كەپىلدىك قورىنا قاتىسۋ تۋرالى كەلىسىمدەرگە قول قويىلدى.
شاعىن جانە ورتا بيزنەسكە كەپىلدىك قورى ۇكىمەت، ەكىنشى دەڭگەيلى بانكتەر جانە وزگە دە ينۆەستورلارمەن بىرلەسىپ قۇرىلادى. ول - كاسىپكەردىڭ كەپىلزاتى جەتكىلىكسىز بولعان جاعدايدا 7 ميلليارد تەڭگەگە دەيىن نەسيە الۋىنا مۇمكىندىك جاسايدى. بۇل قۇرال قولداۋ كۇتەتىن جوبالار كولەمىنىڭ رەسپۋبليكالىق جانە جەرگىلىكتى بيۋجەتتەردەن بولىنەتىن قاراجاتقا تاۋەلدىلىگىن ازايتۋعا سەپ بولماق.
باعدارلاماعا سالىق نەمەسە دە نەسيە تۇرىندەگى قارىزدارى جوق، جۇمىس ىستەپ تۇرعان ميكرو، شاعىن، ورتا جانە ءىرى بيزنەس سۋبەكتىلەرى قاتىسا الادى. ونىڭ اياسىندا شاعىن جانە ورتا بيزنەس سۋبەكتىلەرى 7 ميلليارد تەڭگەگە دەيىنگى قارىزعا نەسيە سوماسىنىڭ 85 پايىزنا دەيىن، ءبىراق 3,5 ميلليارد تەڭگەدەن اسپايتىن كەپىلدىك الا الادى. ءىرى بيزنەس ءۇشىن قۇنى 7 ميلليارد تەڭگەدەن باستالاتىن جوبالار ءۇشىن كەپىلدىكتىڭ ماكسيمال مولشەرى - جوبا قۇنىنىڭ 30 پايىزنا دەيىنگى سوما بولماق.
كەپىلدىك الۋ ءۇشىن كاسىپكەر تىكەلەي بانككە جۇگىنۋى قاجەت.
ەسكە سالا كەتسەك، ءبىر اي بۇرىن ەلىمىزدە شاعىن، ورتا جانە ءىرى بيزنەس ءۇشىن بەرىلەتىن كرەديتكە كەپىلدىك بەرەتىن بىرنەشە قور قۇرىلاتىنى تۋرالى حابارلاعان ەدىك.
