قازاقستاندا بيزنەس كرەديتكە كەپىلدىك بەرەتىن بىرنەشە قور قۇرىلادى

استانا. KAZINFORM - ەلىمىزدە شاعىن، ورتا جانە ءىرى بيزنەس ءۇشىن بەرىلەتىن كرەديتكە كەپىلدىك بەرەتىن بىرنەشە قور قۇرىلادى. قور تۋرالى تولىعىراق ۇكىمەت باسشىسىنىڭ ورىنباسارى سەرىك جۇمانعارين ايتىپ بەردى.

- بيزنەس ءۇشىن كرەديتتەرگە كەپىلدىك بەرۋ ەلىمىزدە دە، باسقا ەلدەردە دە ءتيىمدى پراكتيكا رەتىندە تانىلدى. سوندىقتان 2 كەپىلدىك بەرۋ قورى قۇرىلادى. ولاردىڭ ءبىرى شاعىن جانە ورتا بيزنەسكە كەپىلدىك بەرەدى. شاعىن جانە ورتا بيزنەس ءۇشىن كرەديتتەرگە كەپىلدىك بەرۋ جانە پايىزدىق مولشەرلەمەلەردى سۋبسيديالاۋ كولەمى ۇلعايادى. بيىلدىڭ وزىندە 1,7 تريلليون تەڭگە سوماسىنا 30 مىڭعا جۋىق شاعىن جانە ورتا بيزنەس جوباسىنا قولداۋ كورسەتىلەدى، - دەدى سەرىك جۇمانعارين ۇكىمەت وتىرىسىندا.

سونىمەن قاتار ۇكىمەت باسشىسىنىڭ ورىنباسارى ەلىمىزدە ءىرى بيزنەستىڭ كرەديتتەرىنە كەپىلدىك بەرۋ ءۇشىن جاڭا قور قۇرىلاتىنىن ايتتى.

- ءىرى بيزنەسكە ارنالعان كەپىلدىك بەرۋ قورى ءىرى جانە ستراتەگيالىق ماڭىزدى جوبالاردى كەپىلمەن قامتاماسىز ەتۋ ماسەلەسىن شەشەدى. بۇل ءىرى بيزنەس سانىنىڭ كوبەيۋىنە اسەر ەتەدى. ەكسپورت الەۋەتى وراسان زور، باسەكەگە قابىلەتتى جوبالاردى قۇرۋدا وڭدەۋ ونەركاسىبىنىڭ الەۋەتى جوعارى. ونىڭ ىشىندە مەتالل وڭدەۋ، مۇناي- گاز، اگروونەركاسىپتىك كەشەن ونىمدەرى، حيميا ونەركاسىبى، جەڭىل ونەركاسىپ، تاماق ونىمدەرى، قۇرىلىس ماتەريالدارى ءوندىرىسى، ماشينا جاساۋ سالالارىن، سونداي- اق IT سالاسى بار. ودان بولەك لوگيستيكا، جۇك تاسىمالدارىن، ءتۋريزمدى، شاعىن جانە ورتا بيزنەستى دامىتۋ ءۇشىن ەكو-ورتا قۇرايتىن زاكىرلىك جانە ينفراقۇرىلىمدىق جوبالار مەن كلاستەرلىك-جوبالاردى قارجىلاندىرۋعا باسا نازار اۋدارىلادى، - دەيدى ول.

بۇعان دەيىن حابارلاعانىمىزداي بيىل ەلىمىزدە رەكوردتىق كولەمدە تۇرعىن ءۇي پايدالانۋعا بەرىلمەك.