قازاقستاندا بوسقىن مارتەبەسىن بەرۋ ەرەجەلەرى وزگەردى

استانا. KAZINFORM - ق ر ۇكىمەتى 2024 -جىلعى 7-تامىزداعى قاۋلىسى ارقىلى بوسقىن مارتەبەسىن بەرۋ، ۇزارتۋ، قايتارىپ الۋ جانە توقتاتۋ ەرەجەلەرىنە وزگەرىستەر ەنگىزدى.

جاڭا تۇزەتۋلەردە بوسقىن دەپ تانۋ شەشىمىن جەرگىلىكتى اتقارۋشى ورگان شەشىم قابىلدانعان كۇننەن باستاپ 5 جۇمىس كۇنى ىشىندە تاپسىراتىنى جازىلعان.

بۇل رەتتە، ءوتىنىم بەرۋشى بوسقىن دەپ تانۋ شەشىمنىڭ كوشىرمەسىن جىبەرگەننەن كەيىن 3 اي ىشىندە جەرگىلىكتى اتقارۋشى ورگانعا بوسقىن كۋالىگىن الۋعا كەلمەسە جانە وسى ادامنىڭ ءوزى كورسەتكەن مەكەنجاي بويىنشا كەلمەيتىنى تۋرالى حابارلاما كەلىپ تۇسسە نەمەسە ادامنىڭ قازاقستاننان تىس جەرگە كەتۋى تۋرالى جانە باسقا دا انىق اقپارات الىنسا، جەرگىلىكتى اتقارۋشى ورگان بوسقىن مارتەبەسىن بەرۋ تۋرالى شەشىمنىڭ كۇشىن جويادى.

ق ر اۋماعىندا بوسقىننىڭ تۇرعىلىقتى جەرىن اۋىستىرعاندا ونىڭ جەكە ءىسىنىڭ ماتەريالدارى بوسقىندى ەسەپكە قويۋدىڭ جاڭا ورنى بويىنشا جەرگىلىكتى اتقارۋشى ورگانعا جىبەرىلەدى. ەگەر پانا ىزدەپ جۇرگەن ادامعا زاڭنىڭ 12بابىندا كوزدەلگەن نەگىزدەرگە سايكەس بوسقىن مارتەبەسىن بەرۋدەن باس تارتۋ جاعدايىندا جەرگىلىكتى اتقارۋشى ورگان باس تارتۋ تۋرالى شەشىم قابىلدانعان كۇننەن باستاپ 5 جۇمىس كۇنى ىشىندە باس تارتۋ سەبەپتەرىن جانە قابىلدانعان شەشىمگە شاعىمدانۋ ءتارتىبىن كورسەتە وتىرىپ، شەشىمنىڭ كوشىرمەسىن وسى ادامعا تابىستايدى نەمەسە جولدايدى، وعان قوسا ۋاكىلەتتى ورگان مەن ىشكى ىستەر ورگاندارىن حاباردار ەتىپ، قابىلدانعان شەشىمنىڭ كوشىرمەسىن جىبەرەدى.

مەرزىمدى ۇزارتۋ كەزىندە جەرگىلىكتى اتقارۋشى ورگان بوسقىن كۋالىگىنىڭ، تۇرۋعا ىقتيارحاتتىڭ (بار بولسا)، جول ءجۇرۋ قۇجاتىنىڭ بولۋىن تەكسەرەدى، وتباسى جاعدايىنداعى، وتباسى قۇرامىنداعى، باراتىن مەكەنجايىنداعى وزگەرىستەر تۋرالى مالىمەتتەردى ناقتىلايدى جانە بۇل وزگەرىستەردى بوسقىننىڭ جەكە ىسىنە قوسادى.

بوسقىن مارتەبەسىن ۇزارتۋدان باس تارتىلعان جاعدايدا جەرگىلىكتى اتقارۋشى ورگان قابىلدانعان شەشىمنىڭ كوشىرمەسىن ۇسىنىپ، ۋاكىلەتتى ورگان مەن ىشكى ىستەر ورگاندارىن 5 جۇمىس كۇنى ىشىندە حاباردار ەتەدى، سونداي-اق ءوتىنىم بەرۋشىگە قابىلدانعان شەشىم جانە بوسقىن كۋالىگىن جارامسىز دەپ تانۋ تۋرالى حابارلاما جىبەرەدى.

جەرگىلىكتى اتقارۋشى ورگان بوسقىن مارتەبەسىنەن ايىرۋ تۋرالى شەشىم قابىلدانعان كۇننەن باستاپ، 5 جۇمىس كۇنىندە شەشىمنىڭ سەبەپتەرىن كورسەتىپ جانە وعان شاعىمدانۋ ءتارتىبىن ءتۇسىندىرىپ، كوشىرمەسىن تاپسىرادى نەمەسە جىبەرەدى، سونداي-اق ۋاكىلەتتى ورگان مەن ىشكى ىستەر ورگاندارىن حاباردار ەتەدى.

قاۋلى 2024 -جىلى 20-تامىزدان باستاپ قولدانىسقا ەنگىزىلەدى.

اۆتور
ايجان سەرىكجان قىزى