قازاقستاندا بۇكىل قوعامدىق كولىكتەر ەلەكترون تولەمگە كوشتى
ەلىمىزدىڭ بۇكىل وڭىرىندە قوعامدىق كولىكتەر ەلەكتروندى تولەم جۇيەسىنە كوشتى، - دەپ حابارلايدى Massaget.kz ءتىلشىسى.
بۇگىنگى تاڭدا جول اقىسىن تولەۋدىڭ ەلەكتروندىق جۇيەسى بارلىق رەسپۋبليكالىق ماڭىزى بار قالا مەن وبلىس ورتالىقتارىندا جولاۋشىلاردى تاسىمالدايتىن قوعامدىق كولىكتەردە ەنگىزىلدى. اتالعان جۇيەلەردىڭ جۇمىسىن جالپى سانى 14 وپەراتور قامتاماسىز ەتەدى. سوڭعى 3 جىلدا رەسپۋبليكا بويىنشا قولما-قول اقشاسىز تولەمدەردىڭ ۇلەسى 34 پايىزدان 79 پايىزعا دەيىن جەتتى.
جول اقىسىن تولەۋدىڭ ەلەكتروندىق جۇيەسى جولاۋشىلار تاسىمالىنا ارنالعان قوعامدىق كولىك جۇمىسىنىڭ تيىمدىلىگىن جاقسارتۋعا، جولاۋشىلار اعىنى تۋرالى ناقتى ستاتيستيكالىق دەرەكتەردى قالىپتاستىرۋعا، سونداي-اق تاسىمالداۋشىلاردىڭ جوسىقسىز ارەكەتتەرىن ازايتۋ ەسەبىنەن كولەڭكەلى ەكونوميكادان اقشالاي قاراجاتتى شىعارۋعا ىقپال ەتەدى. سونىمەن قاتار، ەلەكتروندىق بيلەتتەۋ جۇيەسىن ەنگىزۋ ارقىلى NFC تەحنولوگياسىن قولدايتىن بانك كارتالارى، بانكتەردىڭ موبيلدى قوسىمشالارى، SMS- كود جىبەرۋ، QR- كودتى سكانەرلەۋ، سونداي-اق كولىك كارتالارى ارقىلى قولما-قول اقشاسىز جول اقىسىن تولەۋ مۇمكىندىگى پايدا بولدى.
