قازاقستاندا ەڭ بەدەلدى IBO-2024 حالىقارالىق وليمپياداسى باستالدى

Халықаралық олимпиада
Фото: bilimdinews.kz

استانا. KAZINFORM - استانا قالاسىندا وقۋشىلار اراسىنداعى IBO-2024 بيولوگيادان حالىقارالىق ەڭ بەدەلدى وليمپيادانىڭ سالتاناتتى اشىلۋ ءراسىمى ءوتتى، دەپ حابارلايدى ق ر وقۋ-اعارتۋ مينيسترلىگىنىڭ باسپا ءسوز قىزمەتى.

ءىس-شاراعا ق ر وقۋ-اعارتۋ ءمينيسترى عاني بەيسەمبايەۆ، IBO حالىقارالىق كوميتەتىنىڭ ءتوراعاسى لەنكا ليبۋسوۆا ارنايى قاتىستى.

اشىلۋ سالتاناتىندا ءسوز سويلەگەن عاني بەيسەمبايەۆ حالىقارالىق وليمپيادانىڭ ءبىزدىڭ ەلىمىزدە وتكىزىلۋى اسا ماڭىزدى ەكەنىن اتاپ ءوتتى. بيولوگيادان حالىقارالىق وليمپيادا العاش رەت 34 جىل بۇرىن وتكىزىلدى، وعان ول كەزدە تەك 6 ەل قاتىسقان. ال بۇگىن ەل استاناسىندا 81 مەملەكەتتىڭ كوماندالارى جينالدى.

«قازاقتىڭ ۇلى اقىنى، ويشىل اباي قۇنانباي ۇلى وسىدان ءبىر جارىم عاسىر بۇرىن: «ادامنىڭ كۇشى ونىڭ ويى مەن بىلىمىندە جاتىر»، - دەگەن. وسى ءسوزدىڭ بۇگىنگى كۇنى دە وزەكتى ەكەنىنە كۇمان جوق. سىزدەردىڭ كوپشىلىگىڭىز بولاشاقتا بەلگىلى بيولوگ اتانىپ، مىڭجىلدىقتىڭ وراسان زور جاڭالىقتارىن اشاسىزدار دەپ سەنەمىن. وسى وليمپيادا ءارقايسىڭىز ءۇشىن ماماندىق تاڭداۋدىڭ، الەمدىك عىلىمنىڭ يگىلىگى ءۇشىن ەلەۋلى جەتىستىكتەرگە جەتۋدىڭ ماڭىزدى كەزەڭىنە اينالاتىنىنا سەنىمدىمىن. وليمپيادا سىزدەرگە قازاقستانمەن تانىسىپ، ءبىزدىڭ سالت-ءداستۇرىمىز، قوناقجايلىعىمىز بەن دوستىعىمىزدان ۇمىتىلماس اسەر قالدىرادى دەپ ويلايمىن»، - دەدى عاني بەيسەمبايەۆ.

International Biology Olympiad الەمدەگى توپ-7 حالىقارالىق وليمپيادانىڭ ءبىرى. بيىلعى جىلى ءبىلىم دوداسىنا الەمنىڭ 81 ەلىنەن 305 جاس بيولوگ پەن 275 عالىم قاتىسۋدا. قازاقستاندىق وقۋشىلار 28 جىلدان بەرى اتالمىش دودادا ەل نامىسىن قولدان بەرمەي كەلەدى، وسى جىلدار ىشىندە 70 تەن اسا ماراپاتقا يە بولدىق. ۇيىمداستىرۋ كوميتەتىنىڭ بيىلعى وليمپيادانى قازاقستاندا وتكىزۋ تۋرالى شەشىم قابىلداۋىنا دا ءبىزدىڭ وقۋشىلارىمىزدىڭ جەتىستىكتەرى سەبەپ بولدى. قاتىسۋشىلار تەك زياتكەرلىك سايىسقا عانا قاتىسىپ قويماي، سونداي- اق، ەلوردانىڭ كورىكتى جەرلەرىن، قازاقستاننىڭ ءىنجۋ-مارجانى - بۋرابايدى ارالايدى، ەلىمىزدىڭ تاريحىمەن، ونەرىمەن تانىسادى.

سوڭعى جاڭالىقتار